Minn Cristian Muscat
Kif bdiet l-imħabba tiegħek lejn il-waterpolo?
Meta kont żgħir, il-maġġor parti tal-ġranet fis-sajf tiegħi kienu jidhru kollha l-istess – il-minuta li jitla’ x-xemx sa meta tinżel, kont inqatta’ l-ħin in-Neptunes. Kont inqum kmieni, niekol xi ħaġa malajr, u mmur hemmhekk ma’ ħija u sħabi. Kuljum kien jinbidel bejn taħriġ, logħob u sempliċement nieħdu gost fl-ilma, mingħajr ma noqgħodu naħsbu fuq xejn aktar.
Meta bdejt nitħarreġ, indunajt kemm il-waterpolo hu tabilħaqq sport eċitanti u fiżikament impenjattiv. Għoġobni ħafna għax mhux biss huwa logħba ta’ tattika u saħħa, imma wkoll joffri sens ta’ tim u ħbiberija li vera napprezza. Minn hemm ‘il quddiem, bqajt naħdem biex intejjeb il-ħiliet tiegħi u nagħmel l-aħjar li nista’ f’dan l-isport.
Iddeskrivi l-esperjenza preżenti tiegħek ma’ Valletta United Waterpolo Club sa issa.
Ili ma’ Valletta United Waterpolo Club għal tliet snin u nofs, u meta ħadt id-deċiżjoni li nagħmel il-pass lejn il-Belt, kienet verament deċiżjoni krucjali fil-karriera tiegħi. Mill-ewwel ġurnata li dħalt fil-klabb, ħassejtni parti minn familja. L-atmosfera hawnhekk hija speċjali – mhux biss għax għandna tim dedikat u determinat, imma għax hawn sens ta’ għaqda u appoġġ li verament jagħmel differenza.
L-esperjenza ma’ Valletta s’issa kienet waħda ta’ tagħlim u titjib, u qed inħares ’il quddiem biex inkompli naħdem u nagħmel l-almu tiegħi f’dan l-isport li tant inħobb.
X’responsabbiltajiet tħoss ghall-fatt li int proprju l-captain tat-tim?
Bħala l-captain tat-tim, ir-responsabbiltajiet tiegħi jmorru lil hinn mill-logħob innifsu. L-ewwel u qabel kollox, huwa importanti li nkun eżempju għall-kollegi tiegħi, kemm fil-prattika kif ukoll barra mill-ilma. Bħala kaptan, inżomm il-moral tat-tim għoli u nħares lejn l-aspett pożittiv tal-logħba, anke meta jkollna sfidi. Inkunn punt ta referenza bejn il-plejers u l-kowċ, u għandi rwol ta’ komunikazzjoni biex il-messaġġi jaslu b’mod ċar u effettiv.
Madankollu, inkun responsabbli li nżomm id-dixxiplina u nġib lill-plejers kollha flimkien, biex inwettqu l-objettivi tagħna bħala tim, imma wkoll li tmexxi l-grupp b’imħabba lejn l-isport u s-sostenn għal xulxin.
X’tikkummenta fuq il-kowċ u manager tat-tim, Joe Cremona?
Il-kowċ Joe Cremona huwa motivatur naturali. Huwa jagħraf li kull plejer għandu bżonn appoġġ ta’ mod differenti. Il-mod kif jindirizza l-plejers tiegħu huwa speċjalment personali, u ħafna mill-approċċ tiegħu jiddependi fuq l-impenn li jagħti lil kull individwu, fejn jikkuraġġixxi lil kull wieħed biex jagħmel titjib fil loghba tieghu.
Bħala kowċ, huwa jemmen fil-kapaċità tal-plejers tiegħu, u minn din il-fiduċja, jikkultiva ambjent fejn kull plejer iħoss li huwa mportanti għall-grupp. L-approċċ tiegħu huwa wieħed li jqis lill-plejers tiegħu bħala parti minn familja, u dan jagħtihom sens ta’ sigurtà u fidi fl-istess ħin.
Kif tqis il-livell tal-waterpolo Malti fil-preżent?
Il-livell tal-waterpolo Malti fil-preżent qed juri progress konsiderevoli. Għalkemm Malta ma għandiex l-istess riżorsi tal-pajjiżi kbar l-impenn u l-passjoni tal-komunità sportiva Maltija jagħmlu differenza kbira, u dan huwa rifless f’kompetizzjonijiet internazzjonali fejn il-plejers Maltin u t-tim nazzjonali Malti qed ikollhom prestazzjonijiet aħjar.
It-timijiet kollha qed jagħmlu xogħol tajjeb ħafna biex itejbu l-livell tal-waterpolo. Hemm ħafna kowċes tajbin li qed jagħmlu xogħol eċċezzjonali biex il livell joghla. Il-kowċes għandhom esperjenza solida u huma impenjati li jgħinu lill-plejers jiżviluppaw il-ħiliet tagħhom u jikbru bħala atleti.
Grazzi lill-klabbs kollha li qed jagħmlu xogħol siewi biex itejbu l-livell tal-waterpolo Malti. Il-plejers qed igawdu minn taħriġ ta’ kwalità, u dan qed iwassal għal progress konsiderevoli fil-kompetizzjonijiet lokali u anke internazzjonali.
U dak tar-riżorsi (pixxini) fejn titħarrġu u tilagħbu l-logħob tagħkom?
Ir-riżorsi li għandna llum għall-waterpolo f’Malta huma tajbin, speċjalment bil-pixxina l-ġdida f’Kottonera. Din il-pixxina żiedet ħafna l-opportunitajiet għall-plejers biex nittrenjaw iktar tas spis, kif ukoll ikollna iktar spazzju ghat tahrig.
Madankollu, bħal kull sport, iktar riżorsi għandhom ikunu disponibbli biex jiġi żgurat li l-livell tal-waterpolo jiżviluppa.
Grazzi kbira lil SportMalta u lill-ASA għal kull sforz u appoġġ li qed jagħtu biex itejbu l-livell tal-waterpolo f’Malta. Il-ħidma tagħhom għall-iżvilupp tal-infrastruttura, l-organizzazzjoni ta’ kompetizzjonijiet, u l-appoġġ lil-klabbs hija essenzjali biex l-isport ikompli jikber.
Għaddi messaġġ finali lil min jixtieq jagħmel karriera ta’ suċċess fil-waterpolo.
Lil dawk li jixtiequ jagħmlu karriera ta’ suċċess fil-waterpolo, l-iktar ħaġa li għandek bżonn hija l-kuraġġ u l-imħabba għal-logħba. Il-vjaġġ tiegħek mhux se jkun faċli, imma jekk tibqa’ determinat, il-progress se jiġi. Huwa importanti li ddawwar lilek innifsek ma’ nies li jemmnu fik – dawk li jagħtuk il-kuraġġ, il-motivazzjoni, u li jappoġġjawk anki f’ħinijiet diffiċli.
Kull pass li tieħu, l-isfidi li ssib, u l-fallimenti – huma kollha opportunitajiet biex tikber. L-aktar ħaġa importanti hija li ma taqtqx qalbek, imma tibqa’ b’fiduċja li tista’ tirnexxi. Jekk temmen fik u tinvesti fil-ħidma tiegħek, m’hemmx limiti għal dak li tista’ tilħaq!
