Ix-xogħol fuq l-erba’ Reuse Centres li se jkunu qed jinfetħu fiċ-Ċentri għall-Iskart Goff ta’ Ħal Luqa, Ħal Far, l-Imrieħel, u Tal-Kus f’Għawdex miexi ġmielu.
Dan hekk kif illum ġie żvelat id-disinn ta’ dawn iċ-ċentri li se jkunu qed joffru oġġetti użati li għadhom f’kundizzjoni tajba u li jistgħu jerġgħu jintużaw, bħal ċeramika, ġugarelli, kotba u biċċiet tal-għamara.
Il-Ministru għall-Ambjent, it-Tibdil fil-Klima u l-Ippjanar Aaron Farrugia żar iċ-Ċentru għall-Iskart Goff ta’ Ħal Luqa fejn seta’ jara xi oġġetti li se jkunu disponibbli f’dawn iċ-ċentri.
Il-Ministru Farrugia qal li dan il-proġett huwa wieħed mill-aktar modi effettivi ta’ kif nistgħu nnaqqsu l-impatt tagħna fuq l-ambjent. Huwa qal li anke l-ħsieb wara dawn iċ-ċentri huwa wieħed sostenibbli u li jkompli jibni fuq il-kunċett ta’ ekonomija ċirkolari.
Il-Kap Eżekuttiv ta’ WasteServ Richard Bilocca qal li permezz ta’ dawn iċ-ċentri, WasteServ se tipprevjeni l-iskart billi tippromwovi l-użu mill-ġdid ta’ oġġetti li għadhom f’kundizzjoni tajba. Huwa qal li dawn iċ-ċentri se jippermettulna nkunu aktar responsabbli fil-konsum tagħna u anke aktar kreattivi peress li se jagħtu lok għal proġetti ta’ DIY fejn wieħed ħa jkun jista’ jsib oġġetti jew materjali li jgħinuk toħloq affarijiet ġodda u bi ftit flus.
Dawn iċ-ċentri se jkunu qed jibdew jinfetħu sal-aħħar tas-sena.
