L-Isqof Awziljarju David O’Connell inqatel ilbieraħ hekk kif persuna jew persuni daħlu fid-dar tiegħu u sparawlu f’Los Angeles. Hu serva l-komunità ta’ Los Angeles għal 40 sena sħaħ.
O’Connell li nqatel fl-età ta’ 69 sena nstab mejjet b’diversi tiri ta’ arma tan-nar.
Hekk kif seħħ id-delitt, il-pulizija ta’ Los Angeles qalu lill-midja li kien instab raġel mejjet fid-dar tiegħu u kien hemm indikazzjoni ċara li hu ġie maqtul. Fl-ebda ħin ma taw informazzjoni dwar l-età jew l-identità tiegħu.
Iżda kien l-Arċisqof José H. Gomez li fi stqarrija qal li O’Connell għadda għal ħajja ta’ dejjem.
L-Arċisqof fl-istqarrija jgħid li “hu kien maħbub ħafna mill-foqra u mill-immigranti li kien hemm jgħixu fil-komunità tiegħu. Kien jaħdem ħafna għal paċi fl-istat ta’ Los Angeles. Hu dejjem emmen li kull persuna għandha d-dinjità tagħha u għandha tkun protetta.”
Michael Modica, l-investigatur ewlieni tal-każ qal li “għadu kmieni wisq biex wieħed jasal għal xi konklużżjoni”. Hu kompla jgħid li s’issa ma hemmx persuni suspettati li setgħu wettqu dan il-qtil.
Kien Papa Franġisku li kien ħatar lil O’Connell bħala Isqof Awziljarju fl-2015.
