Mateo Kovacic jinsab viċin li jingħaqad ma’ Manchester City wara li ntlaħaq ftehim ma’ Chelsea għas-somma ta’ £30 miljun.
Il-midfielder tal-Kroazja ta’ 29 sena huwa lest li jingħaqad maċ-champions tal-Premier League għal ħlas inizjali ta’ £25 miljun, b’£5 miljuni f’bonuses oħra.
Chelsea qed ikomplu jbiegħu bosta players biex inaqqsu l-iskwadra kbira tagħhom.
Kovacic ingħaqad ma’ Chelsea mingħand Real Madrid fl-2019, inizjalment b’self, qabel ma ffirma kuntratt permanenti ta’ ħames snin.
Il-wasla ta’ Kovacic se titfa’ aktar dubju dwar il-futur ta’ Ilkay Gundogan ma’ Manchester City, bil-kuntratt tal-midfielder Ġermaniż wasal biex jiskadi.
Kovacic għamel 37 dehra fil-kompetizzjonijiet kollha għal Chelsea l-istaġun li għadda.
Huwa kien parti mit-team ta’ Chelsea li rebaħ iċ-Champions League fl-2021 meta daħal bħala sostitut tard fir-rebħa ta’ 1-0 fuq l-istess Manchester City.
