Il-Pulizija ressqet raġel fil-Qorti u mistennija tarresta aktar persuni b’rabta ma’ każi ta’ serq minn karozzi fil-Marsa u Ħal Qormi.
Abdulhamid Saied ta’ 42 sena mil-Libja kien mixli li fit-30 u l-31 ta’ Awwissu seraq flus kontanti u apparat elettroniku minn żewġ karozzi. Huwa kien akkużat ukoll li kien riċediv.
Saied, li fil-Qorti qal li ma jaħdimx, wieġeb mhux ħati tal-akkużi miġjuba kontra tiegħu. L-Ispettur Mark Cremona spjega li l-pulizija kienet qiegħda tinvestiga diversi serqiet minn karozzi u identifikat numru ta’ persuni, wieħed minnhom l-imputat.
L-Ispettur Cremona żied jgħid li nħareġ mandat ta’ arrest kontrih u ġie arrestat. Saied ma wieġeb għall-ebda domanda li saritlu waqt l-interrogazzjoni.
Huwa nżamm arrestat wara li ma saret l-ebda talba għall-ħelsien mill-arrest tiegħu.
Il-Prosekuzzjoni tmexxiet ukoll mill-Ispettur Andy Rotin. L-Avukat Victor Bugeja deher għall-imputat.
