Raġel ta’ 27 sena nżamm arrestat wara li ġie mixli li stupra mara Pollakka, wara li ltaqa’ magħha fuq app tal-‘couchsurfing’.
Saliou Balde mis-Senegal iżda residenti l-Marsa tressaq quddiem il-Maġistrat Joseph Gatt fejn wieġeb mhux ħati tal-akkużi miġjuba kontrih.
Ir-raġel, li ilu jgħix f’pajjiżna għal dawn l-aħħar tmien snin, kien mixli bi stupru u li wettaq atti ta’ natura sesswali mingħajr il-kunsens tal-vittma.
L-Ispettur John Spiteri, li mexxa l-Prosekuzzjoni, spjega ċ-ċirkostanzi li wasslu għall-arrest tar-raġel. Qal li fl-10 ta’ Lulju, il-mara Pollakka għamlet rapport fl-Għassa ta’ Ħaż-Żebbuġ fejn spjegat li hija kienet qiegħda tagħmel backpacking (tivvjaġġa minn post għall-ieħor b’basket ma’ dahra) f’Malta u riedet tivvjaġġa madwar l-Ewropea.
Hija kienet qalet lill-pulizija li kienet tkellmet ma’ Balde permezz tal-couchsurfing app, u kien provdielha kamra fir-residenza tiegħu biex tqatta’ l-lejl hemmhekk.
Ġara iżda li meta waslet f’din il-proprjetà, għall-ħabta tal-10.00 p.m. tal-4 ta’ Lulju, hija skopriet li kellha toqgħod fl-istess sodda mal-imputat. Minħabba li ma kienx hemm akkomodazzjoni oħra disponibbli, il-mara daħlet torqod u allegatament l-imputat għamel avvanzi sesswali fuqha u beda jmissha b’mod mhux xieraq.
L-Ispettur qal li l-imputat ma kienx ikkontradixxa l-verżjoni tal-mara iżda qal li kien jiddispjaċih u li f’dak il-lejl kien fi stat ta’ sakra. Balde kien arrestat il-Ħadd li għadda u tressaq il-Qorti lbieraħ.
Fil-kontro-eżami, l-Ispettur ikkonferma li skont l-isqarrijiet mogħtija mill-partijiet, jirriżulta li kemm l-imputat u l-allegata vittma kienu marru f’xi ħwienet flimkien qabel seħħ l-allegat inċident. Huma kkonfermaw mal-Pulizija li kienu ħadu flixkun birra flimkien u anke kkonsmaw il-kannabis.
Fil-Qorti saret talba għall-ħelsien mill-arrest ta’ Balde, bil-Prosekuzzjoni toġġezzjona minħabba l-biża’ ta’ intralċ ta’ provi. Il-Qorti ċaħdet it-talba minħabba l-gravità tal-akkużi u l-fatt li l-allegata vittma għad trid tagħti x-xhieda tagħha. Inħarġet ukoll ordni ta’ protezzjoni favur tagħha.
Il-Prosekuzzjoni tmexxiet mill-Ispetturi John Spiteri u Elisia Scicluna megħjuna mill-Avukat Darlene Grima mill-Uffiċċju tal-Avukat Ġenerali. L-Avukati Jason Azzopardi u Kris Busietta dehru għall-imputat.
