“Ma taħsbux li bħala leġiżlaturi għandna ndaħħlu malajr kemm jista’ jkun abbozz biex fuq il-postijiet tax-xogħol b’aktar minn 50 persuna jkun hemm policy kontra l-fastidju sesswali”. Iddikjara dan id-deputat Nazzjonalista Darren Carabott filwaqt li rrimarka li din għandha biss tkun prevenzjoni addizzjonali tal-liġi biex il-fastidju sesswali fuq il-post tax-xogħol ma jsir qatt. Huwa rrefera għal statistika li turi li tlieta minn kull erba’ nisa fuq il-post tax-xogħol huma esposti għal fastidju soċjali.
Minn naħa tiegħu Carabott qal li hija biss kelma li qiegħda tinbidel imma li tfisser ħafna. F’Marzu li għadda kellna sentenza li minħabba din l-iżball ta’ kelma, naqset milli tagħti sentenza ta’ kundanna ta’ għaġir li mhuwiex aċċettabbli.
Dan għaliex fil-liġi hemm il-kelma ‘u’ minflok kliem aktar xieraq u spjegat dwar kif xi ħadd jista’ jinstab ħati ta’ fastidju sesswali fuq il-post tax-xogħol. Spjega li l-liġi tgħid li jrid ikun “Offensiv, umiljanti u intimidatorji u f’dan il-każ partikolari l-Imħallef sabet tnejn minn tlieta u kellha tirriżorti għal sentenza li tillibera minħabba nuqqas ta’ ċarezza.
Carabott qal li b’din l-emenda l-gvern qiegħed jipproponi li l-kelma ‘u’ tinbidel biex tinqara ‘jew’. Agħar minn hekk huwa rrefera għad-diskrepanza fil-qasam leġiżlattiv fejn minħabba li bl-Ingliż hija mniżżla korretta bħala ‘or’, iżda minħabba li l-Malti jipprevali, il-qorti kellha tillibera lil dan l-individwu għax ma nstabx ħati tat-tlieta li huma.
Carabott ġibed l-attenzjoni tal-Kamra u ssuġġerixxa li minflok il-kelma ‘jew’, l-emenda tinkludi l-frażi ‘waħda minnhom jew iktar’ għaliex jara lok li l-emenda proposta mill-gvern tista’ tagħti lok għal interpretazzjoni ta’ waħda mit-tliet nuqqasijiet, daqslikieku pereżempju bi tnejn jew tlieta l-individwu jkun jista’ jorbot idejn il-qorti fis-sentenza.
