F’konferenza tal-aħbarijiet, is-Segretarju Parlamentari Keith Azzopardi Tanti, flimkien ma’ Aġenzija Żgħażagħ u l-Malta Film Foundation, ħabbru t-tnedija tal-Malta Youth Film Festival 2025 (MYFF). Din l-inizjattiva annwali tagħti pjattaforma lil film-makers żgħażagħ biex jesprimu l-ideat tagħhom u juru t-talenti tagħhom permezz tal-films qosra. Din is-sena, il-festival se jsir f’Ġunju 2025 u l-applikazzjonijiet fetħu llum.
Din l-inizjattiva tirrifletti impenn lejn il-promozzjoni tal-kreattività fost iż-żgħażagħ, filwaqt li tgħinhom jiżviluppaw kemm personalment kif ukoll professjonalment, u tagħti bidu għal epoka ġdida ta’ innovazzjoni kreattiva f’Malta.
Is-Segretarju Parlamentari għaż-Żgħażagħ Keith Azzopardi Tanti, esprima s-sodisfazzjon tiegħu għal din l-inizjattiva. “Il-Festival tal-Films taż-Żgħażagħ huwa aktar minn kompetizzjoni. Huwa opportunità għal film-makers żgħażagħ tagħna biex jgħidu l-istorja tagħhom, jiżviluppaw il-ħiliet tagħhom u jikkontribwixxu għas-settur kreattiv f’Malta. Qed noħolqu spazju fejn jistgħu jikbru bħala individwi u professjonisti,” qal is-Segretarju Parlamentari Keith Azzopardi Tanti.
Min-naħa tagħha, Joyce Grech, President tal-Malta Film Foundation, saħqet fuq l-importanza tal-festival bħala mezz biex tissaħħaħ il-kreattività fost iż-żgħażagħ. “Dan il-festival huwa mod kif ngħinu lil film-makers żgħażagħ jibnu l-futur tagħhom, filwaqt li jħallu impatt pożittiv fuq il-kultura tagħna,” qalet Joyce Grech.
Il-Malta Youth Film Festival huwa parti mill-programm tal-Arti u l-Kultura ta’ Aġenzija Żgħażagħ u jaħdem id f’id mal-Malta Film Foundation u l-Kummissjoni tal-Films ta’ Malta. Il-festival joffri premjijiet f’diversi kategoriji, inkluż l-aqwa skript, direzzjoni, u fotografija, kif ukoll premju għal dak il-film li jattira l-aktar voti mill-pubbliku. Ir-rebbieħ tal-premju għall-Aqwa Film se jirċievi premju ta’ €600.
Żgħażagħ bejn is-16 u t-30 sena huma mistiedna jipparteċipaw billi jissottomettu l-films qosra tagħhom sa nhar il-25 ta’ April 2025. Id-dettalji u l-linji gwida jistgħu jinkisbu fuq youth.gov.mt.
Is-Segretarju Parlamentari ħeġġeġ liż-żgħażagħ kollha biex jieħdu vantaġġ minn din l-opportunità. “Dan il-festival huwa għodda għalikom biex tesprimu ruħkom, tesploraw il-potenzjal tagħkom, u tikkontribwixxu għad-dinja kreattiva, sabiex flimkien nikkultivaw futur b’aktar talent u espressjoni kreattiva,” temm jgħid Azzopardi Tanti.
