Minn Cristian Muscat
Kif għażilt l-atletika fost minjiera ta’ sports ieħor?
Qabel ma bdejt nipprattika l-atletika kont nitħarreġ il-football. Minn dejjem kelli f’moħħi li jekk xi darba nieqaf nillgħab il- football, nibda niġri. Minn dejjem kien jogħġobni l- ġiri bhala sport.
X’ħeġġek l-iktar biex tibda tipprattika dan l-isport?
Minn dejjem kelli l-ħajra li nibda nipprattika l-atletika, infatti kont bdejt niġri għall-gost u biex nirrilassa.
Bdejt nagħmel xi tlielaq ukoll, u meta tibda tkun konsistenti, ovvjament tibda tara titjib fil-ħin kif ukoll fil-fiżika.
Darba kien avviċinani ex coach li kelli, Paul Camilleri, u kien ħeġġiġni ħafna biex nieħu l-atletika iktar bis-serjetá.
Min kien dak il-persuna li ispirak biex tagħżel l-atletika?
Bħala persuna li ispirani kien il-ħabib tiegħi u atleta Jean Paul Debono, kif ukoll l-ex coach Paul Camilleri.
Liema unuri prinċipali irnexxielek tikseb fil-karriera tiegħek?
Bla dubju, tlielaq li ma ninsa qatt huma fejn inkun ksibt ħin tajjeb kif ukoll inkun tlajt fuq il-podju, fosthom in-National Championships ta’ ħames kilometri li saru fit-30 ta Ġunju 2019 ġewwa t-trakka tal-Marsa fejn ikklassifikajt fit-tielet post overall.
Tellieqa oħra kienet ta’ Ħaż-Żabbar li saret fil-25 ta’ Awwissu 2019, fuq ħames km wkoll, fejn ġejt fit-tieni post overall, kif ukoll in-Night Run li saret fit-2 ta’ Awwissu 2019, fejn ġejt fit-tieni post overall, u l-aħħar Half Marathon li għamilt fid-19 ta’ Diċembru 2021 ġewwa Pisa l-Italja fejn kienet esperjenza sabiħa ħafna mal-club Mellieħa AC fejn għamilt l-aqwa ħin personali tiegħi u ġejt fis-sitt post overall.
Kemm ilni nieħu sehem fit-tlielaq, għalkemm kelli ħafna riżultati tajbin u li ma ninsa qatt, għadni qatt ma ġrejt u rbaħt tellieqa, u ovvjament hija x-xewqa ta’ kull atleta li jagħmel ħin tajjeb u forsi xi darba jikseb l-ewwel post ukoll.
Ta’ kemm bdejt tipprattikka l-atletika?
Daqs erba’ snin ilu bdejt nipprattika l-ġiri, bażikament ta’ 30 sena. Peró, il-fatt li kont attiv fil-football, dejjem għenni.
Liema kien l-aħjar ħin tiegħek sa issa?
L-aħjar ħinjiet tiegħi huma:
– 3000m – 9min 20sek
– 5000m – 15min 57sek
– 10,000m – 34min 52sek
– Mdina 2 Spinola – 1hr 1min 40 sek
– Half Marathon 1hr 16min 44sek
Taħseb li l-media tagħtikom biżżejjed pubbliċità u exposure jew dan isir waqt kompetizzjonijiet importanti bhal mhuma l- Logħob tal-Pajjiżi ż- Żgħar?
In-numru ta’ nies li qed jipprattikaw l-atletika żdied ħafna f’dawn l-aħħar sentejn, peró nemmen li għad hemm lok ta’ fejn nistgħu nżidu l-exposure għalina l-atleti, kemm bħala opportunitajiet kif ukoll exposure ta’ media fuq stazzjonijiet u gazzetti lokali.
Huwa fatt li l-ġiri fih beneficcji kemm ta’ saħħa fiżika kif ukoll mentali u jgħinek biex tirrilassa u ssib ħin għalik innifsek.
Għandek xi ħolma li tixtieq tikseb fl-atletika?
Nixtieq li ovvjament nibqa’ nipprattika dan l-isport u nibqa’ ntejjeb il- ħinijiet tiegħi.
Peró, il-ħolma tiegħi hija li xi darba nirrapprezenta lil Malta. Ovvjament mhijiex faċli, peró nibqa’ nagħmel ħilti.
X’sagrifiċċji u mpenji jitlob l-isport li int tipprattikka?
Biex iġġib riżultati tajbin u tibqa’ tibni fuq it- tajjeb li jkollok, trid tagħmel commitments kbar.
L-iktar importanti huwa li tippjana kif se tqassam il-ħin bl-aħjar mod.
Ovvjament trid issib ħin għal kollox – xogħol, familja kif ukoll it-taħriġ, fejn ħafna drabi jkollna double sessions.
L-ikbar sagrificcju huwa li tqum kmieni, madwar il-ħamsa ta’ filgħodu biex inkun nista’ ndaħħal it-taħriġ qabel ma nibda l-ġurnata tax-xogħol.
Sagrifiċċju ieħor huwa li toqgħod attent għall-ikel li tiekol, speċjalment meta tkun ġejja xi tellieqa.
Għalkemm l-atleti li tikkompeti magħhom huma wkoll ħbieb tiegħek, ninsab persważ li jidħol ukoll ċertu sens ta’ kompetizzjoni fejn wieħed ikun irid jikseb ħin aħjar mill-ieħor. X’tikkummenta?
Il-ġiri għallimni ħaġa vera importanti – dik li jien niġri kontra l-ħin u mhux kontra n-nies. Kulħadd qiegħed jiġri t-tellieqa personali tiegħu.
Aħna kollha niġru biex intejbu l-ħin tagħna personali, li nkunu ftehemna mal-coach tagħna.
Anzi, huwa ta’ pjacir li nara lil sħabi l-atleti jagħmlu ħinijiet sbieħ, u fejn nistgħu, nagħmlu kuraġġ lil xulxin, anke waqt it-tlielaq.
Naqra sens ta’ kompetizzjoni jidħol ftit fejn inkunu nistgħu mmorru tajjeb bħala club.
X’kompetizzjonijiet prinċipali se tieħu sehem fihom fil-futur qrib?
Jekk Alla jrid, nibdew niġru xi tlielaq fejn isiru kem fit triq u anke fit-trakka tal-Marsa.
Il-pjani huma li din is-sena nerġa’ mmur niġri half marathon u xi 10k race barra minn xtutna.
Matul is sena li għaddiet, ingħaqadt mal-club ta’ Mellieħa A.C fejn nemmen li għad baqagħli fejn intejjeb il-ħin personali tiegħi, u se nibqa’ nitħarreġ u nagħmel l-almu tiegħi biex dan inwettqu.
Tista’ tħaddi messaġġ lil dawk it-tfal u żgħażagħ li qegħdin jaħsbuha bis-serjetà li jibdew jipprattikaw l-atletika?
L-isport huwa kollu sabiħ għax iżommok b’saħħtek kif ukoll ‘il-bogħod mill-vizzji.
Il-messaġġ tiegħi lejn iż-żgħażagħ huwa li ma jaqtgħu qalbhom qatt u li qatt m’hu tard biex tibda tipprattika kull tip ta’ sport u anke kull forma ta’ eżerċiżżju.
L-importanti huwa li tagħmel sport li tieħu pjaċir tagħmel u fejn fih issib naqra ħin għalik innifsek biex tistrieħ mir-rutina u l-istress tal-ħajja ta’ kuljum.
Nemmen ukoll li l-isport lit-tfal jgħinhom ukoll biex jitgħallmu jqassmu l-ħin sew.
