Meta llum tintlagħab l-20 ġurnata tal-BOV Kampjonat Premier, l-aktar partita li tispikka hija dik bejn Hamrun Spartans u Hibernians liema partita ħadd ma jaffordja jitlef.
Partita oħra interessanti hija dik bejn Valletta u Sliema Wanderers filwaqt li Floriana jiltaqgħu kontra Gudja United fejn jittamaw minn żelqa oħra Pawlista.
Hamrun S. v Hibernians – Dan huwa l-aqwa konfront ta’ tmiem il-ġimgħa li xejn għajr minn rebħa ma tissodisfa l-kriterji taż-żewġ timijiet.
Dan minħabba li l-leaders Hibernians sofrew l-ewwel telfa tal-istaġun li kienet kontra Birkirkara bl-iskor ta’ 3-2 u għaldaqsant il-vantaġġ tagħhom naqas għal punt wieħed biss filwaqt li Hamrun Spartans, li ġejjin minn draw diżappuntanti ta’ 1-1 kontra Sirens, jinsabu f’pożizzjoni mwiegħra li jistgħu jispiċċaw fir-Relegation Pool.
Dan ir-riżultat ifisser li l-Ispartans ilhom ma jirbħu għal dawn l-aħħar sitt partiti u ma jistgħux jaffordjaw aktar skossi għat-tmiem tal-ewwel fażi fejn fadal tliet partiti bl-avversarju tagħhom se jkunu wkoll St Lucia u Sliema Wanderers, it-tnejn fil-bżonn tal-punti kontra r-relegazzjoni.
Hibernians se jkunu mingħajr is-servizzi tas-sospiżi Andrei Agius u Leandro Almeida. Min-naħa l-oħra, il-players kollha huma disponibbli għall-Ispartans.
Fl-ewwel round Hibernians kienu ħarġu rebbieħa bl-iskor ta’ 1-0.
Valletta v Sliema W.– Din hija partita bejn żewġ rivali antiki li fi tmiem il-ġimgħa li għadda l-problemi tagħhom intensifikaw b’mod konsiderevoli meta sfaw megħluba … Valletta kontra Sta Lucia (2-1) u Sliema Wanderers kontra Mosta (1-0).
B’hekk issa l-Beltin sofrew ir-raba’ telfa konsekuttiva, ilhom ma jirbħu għal dawn l-aħħar disa’ partiti, jinsabu fit-tmien pożizzjoni … biex jistgħu jitilfu post fiċ-Championship Pool.
Min-naħa l-oħra, il-Wanderers jinsabu f’qiegħ il- klassifika u 10 punti bogħod mis-salvazzjoni.
Ta’ min isemmi li fl-ewwel round il-Wanderers kienu ħarġu rebbieħa bl-iskor ta’ 2-1 iżda l-punti ngħataw lil-Lilywhites li kellhom protest milqugħ fir-rigward tal-ineliġġibiltá ta’ Warsama Hassan.
Danny Holla u Jean Carlos Goncalves huma sospiżi għal Sliema iżda Inters Gui jirritorna minn sospensjoni. Peró huma tilfu s-servizzi tal-imweġġa’ Kurt Shaw għall-kumplament tal-istaġun. Valletta għandhom il-players kollha għad-diżpożizzjoni.
Floriana v Gudja U. – Dan huwa test delikat għal Floriana u Gudja United li t-tnejn irreġistraw rebħiet importanti. Floriana għelbu lil Gzira United bl-iskor ta’ 2-1 biex naqqsu d-distakk għal punt wieħed fil-quċċata tal-klassifika filwaqt li Gudja United għelbu lil Balzan bl-iskor ta’ 1-0.
Floriana ilhom ma jitilfu għal dawn l-aħħar disa’ partiti iżda huma se jilagħbu kontra team li rebaħ ħames partiti mill-aħħar sitt ħarġiet tiegħu u jinsab f’pożizzjoni komda. Bħalissa Gudja jinsabu fis-seba’ post … żewġ punti inqas minn Hamrun Spartans li jinsabu fir-raba’ post u għaldaqstant huma sfidanti denji biex jikkwalifikaw fiċ-Championship Pool.
Iż-żewġ timijiet se jkunu mingħajr il-goalkeepers regolari tagħhom għax jinsabu sospiżi – Glenn Zammit għal Gudja u Georgi Kitanov għal Floriana flimkien ma’ Emiliano Callegari iżda Matias Garcia jirritorna minn sospensjoni.
Fl-ewwel round Floriana rebħu 1-0.
Birkirkara v Sta Lucia – Birkirkara, li jinsabu fit-tielet post, jaffrontaw lil Sta Lucia li ġejjin minn rebħa ta’ 2-1 fuq Valletta biex żammew ħajjin it-tamiet tagħhom kontra r-relegazzjoni hekk kif jinsabu fil-post ta’ qabel l-aħħar.
Birkirkara ġejjin minn rebħa fuq Hibernians u għaldaqstant fuq il-karta jibdew favoriti għar-rebħ tat-tliet punti. Peró l-Luċjani mhux se jċedu pulzier minħabba li jinsabu fil-bżonn tal-punti.
L-uniku player sospiż huwa l-midfielder ta’ Birkirkara Claudio Bonanni iżda Kurt Zammit (għall-Istripes) u Jamie Zerafa (għal Sta Lucia) jirritornaw minn sospensjoni.
Gzira U. v Mosta – Dan huwa test delikat kemm għal Gzira United kif ukoll għal Mosta. Bħalissa l-Maroons jinsabu fil-ħames post u qed jimmiraw għar-raba’ post u għal football Ewropew.
Dan minħabba li jidher li l-ewwel tliet postijiet diġá ttieħdu minn Hibernians, Floriana u Birkirkara u għaldaqstant hemm taqtiegħa bejn erba’ timijiet, li jinkludu wkoll lil Hamrun Spartans, Sirens u Gudja United, għal post wieħed.
Min-naħa l-oħra, Mosta jimmiraw għal rebħa hekk kif jinsabu ħames punti biss fuq iż-żona l-ħamra u r-riskju tar-relegazzjoni qed jiżdied.
Gżira se jkollhom jgħaddu mingħajr is-servizzi tas-sospiż Gabriel Bohrer Mentz iżda Geoffrey Acheampong se jirritorna għal Mosta minn sospensjoni.
Fl-ewwel round spiċċaw fi draw ta’ 2-2.
Balzan v Sirens – Balzan se jkunu mpenjati f’logħba diffiċli kontra Sirens hekk kif jinsabu jikkumbattu kontra r-relegazzjoni wara sensiela ta’ ħames telfiet konsekuttivi … u fl-aħħar seba’ ħarġiet tagħhom kisbu punt wieħed biss.
Għaldaqstant dan huwa konfront li ma jistgħux ifallu minħabba li l-periklu għalihom jiżdied hekk kif jinsabu erba’ punti biss fuq iż-żona tar-relegazzjoni … u jistgħu faċilment jintlaħqu minn Sta Lucia.
Min-naħa l-oħra Sirens se jinżlu għal din il-partita biex ipattu għall-umiljazzjoni tal-ewwel round bl-iskor ta’ 6-1.
Dan minbarra li jinsabu fit-taqtiegħa għar-raba’ post li jfisser post fil-kompetizzjonijiet Ewropej.
Il-Pawlini ġejjin minn draw ta’ 1-1 kontra Hamrun Spartans fejn iridu jirritornaw għar-rebħ wara żewġ draws.
Diego Albanese jirritorna għalihom minn sospensjoni … biż-żewġ timijiet se jkunu bl-aqwa formazzjoni.
