Minn Cristian Muscat – ritratt: Dominic Borg
Hibernians …….3
Mosta ………….2
Hibernians ikkonsolidaw posthom fil-quċċata tal-klassifika bi 12-il punt meta għelbu lil Mosta bl-iskor ta’ 3-2, biex kisbu r-raba’ rebħa konsekuttiva.
Bla dubju, din ir-rebħa tkompli ssaħħaħ l-objettivi tal-Pawlisti li jkunu sfidanti denji għar-rebħ tal-kampjonat hekk kif huma armati tajjeb f’kull dipartiment.
Huma rnexxielhom jiftħu l-iskor proprju fl-ewwel azzjoni perikoluża li ħolqu, fid-19-il minuta, permezz ta’ JURGEN DEGABRIELE li venven xutt b’saħħtu fil-baxx minn qagħda ideali, bil-ballun jintemm fir-rokna tax-xibka.
Dan il-goal ftit li xejn deher li ħasad lil Mosta hekk kif huma bdew jipproduċu logħob sabiħ u fit-22 minuta Johnson Nsumoh kellu xutt salvat mill-goalkeeper tat-team minn Raħal Ġdid, Ibrahim Kone.
Appena għaddew żewġ minuti, wara li rċieva l-ballun minn through pass, Christ Ememe pprova jaqbeż lil Kone iżda l-goalkeeper mill-Guinea kien pront u interċetta kull periklu.
Christ Ememe beda jirriżulta ta’ theddida kontinwa għad-difiża Pawlista u man-nofs siegħa logħob, huwa avvanza tajjeb fil-kaxxa, b’Kone jkollu joħroġ minn postu fil-ħin biex jevita kull periklu għat-team tiegħu.
Fil-ftuħ tat-tieni taqsima, Hibernians ħarġu ferm aggressivi u fil-50 minuta rnexxielhom isibu x-xibka meta xutt ta’ Jake Grech naqas milli jiġi kklerjat mid-difiża ta’ Mosta, bil-ballun jintemm għand DUNSTAN VELLA li kellu x-xutt tiegħu jintemm fis-saqaf tax-xibka.
Il-Pawlisti komplew jippressaw u erba’ minuti biss wara Wilfried Domoraud kellu xutt bid-dawra jintemm ftit għoli.
Iżda fis-56 minuta kien proprju l-attakkant Franċiż Domoraud li wara li rċieva l-ballun mingħand Dunstan Vella, deher jitwaqqa’ mill-goalkeeper ta’ Mosta Marko Jovicic, biex ir-referee Glen Tonna kien pront u ordna penalty. Mill-11-il metru nkariga ruħu JAKE GRECH li ma żbaljax.
Dan sabiex fis-70 minuta fuq in-naħa l-oħra tal-pitch Jurgen Degabriele wara li rċieva mingħand Raphael dos Anjos, qabeż difensur avversarju qabel kellu x-xutt tiegħu minn ġol-kaxxa mdawwar f’corner bi bravura minn Marko Jovicic.
Fis-86 minuta, Mosta rebħu penalty wara li d-difensur ta’ Hibernians Leandro Almeida deher iwaqqa’ player ta’ Mosta fil-kaxxa.Mill-11 il metru nkariga ruħu CLAYTON FAILLA li ma żbaljax.
Huma komplew fuq l-offensiva u fit-92 minuta naqqsu l-marġni tal-iskor permezz ta’ xutt minn tarf il-kaxxa tas-sostitut WILLIAM DONKIN li ma ta l-ebda ċans lil Kone jsalva.
HIBERNIANS: 24-Ibrahim Kone-6, 3-Ferdinando Apap, 4-Leandro Almeida, 6-Raphael Dos Anjos (7-Ayrton Attard 77), 8-Jake Grech (2-Timmy Tabone Desira 82), 10-Jurgen Degabriele (11-Bjorn Kristensen 74), 12-Dunstan Vella, 18-Thaylor Aldama (13-Zachary Grech 81), 20-Andrei Agius, 22-Gabriel Artiles, 88-Wilfried Domoraud (19-Francis Mensah 82) – Coach: Stefano Sanderra
MOSTA: 61-Marko Jovicic, 6-Roderick Briffa (2-Nathan Aguis 79), 8-Christ Ememe, 13-Clayton Failla, 14-Johnson Nsumoh (15-Jake Vassallo 79), 22-Tyrone Farrugia, 24-Ivan Doric, 27-Mehdi Hetemaj, 77-Zachary Brincat (86-Luiz Igbineweka 79), 88-Ayonfe Sunday Akinbule, Jonas Rodriguez Ekani (7-William Donkin 58) – Coach: Joseph Grech
REFEREE: Glen Tonna
ASS. REFEREES: Jurgen Spiteri, Duncan Spencer
RABA’ UFF: Daniel Casha
SKORERS: J. Degabriele 19, D. Vella 50, J. Grech 56 pen (H), C. Failla 86 pen, W. Donkin 92 (M)
AMMONITI: R. Briffa, J. Nsumoh, M. Jovicic (M), W. Domoraud, L. Almeida (H)
PLAYER TAL-LOGĦBA – Jurgen Degabriele (Hibs)
