Ritratt: Dominic Borg
Bejn illum u għada, tintlagħab is-seba’ ġurnata tal-BOV Kampjonat Premier fejn l-attenzjoni prinċipali tkun mixħuta fuq il-logħba bejn il-leaders Hibernians u Valletta.
Iċ-champions Hamrun Spartans għandhom partita delikata kontra Gudja United fejn xejn għajr minn rebħa ma tissodisfa l-kriterji tagħhom.
Birkirkara jittamaw minn żelqa Pawlista hekk kif fuq il-karta jibdew favoriti li jiksbu t-tliet punti kontra Sirens.
Hibernians v Valletta – Wara li mpressjonaw fir-rebħa ta’ 3-0 fuq Sliema Wanderers, Hibernians jiffaċċjaw lil Valletta li ġejjin minn rebħa ta’ 3-1 fuq Sirens.
Bla dubju, dan il-konfront huwa test diffiċli għal Hibernians hekk kif qed jimmiraw li jkomplu jkabbru s-sensiela ta’ mingħajr telfa hekk kif mill-aħħar sitt logħbiet waqqgħu biss żewġ punti.
Filwaqt li l-Pawlisti għandhom l-aqwa attakk, wieħed mill-aktar players li qed jispikka huwa Jake Grech … konsistenti, intelliġenti u b’distribuzzjoni eċċellenti.
Min-naħa l-oħra, Jurgen Degabriele stabbilixxa lilu bħala wieħed mill-aqwa attakkanti u skorer naturali. Fl-aħħar logħba huwa skorja doppjetta fejn saħansitra seta’ skorja aktar.
L-għan tal-Beltin huwa li jkomplu jibnu fuq l-aħħar rebħa fejn jittamaw li Mario Fontanella jkun fl-istess forma li biha skorja tripletta kontra l-Pawlini.
Iżda l-coach ta’ Hibernians, Stefano Sanderra, żgur li għandu pjan kif se jwaqqaf lill-attakkant Taljan.
Għal Valletta jirritornaw Joseph Zerafa u Ryan Camilleri minn sospensjoni filwaqt li d-difensur ta’ Hibernians, Ferdinando Apap, huwa sospiż.
Gudja U. v Hamrun S. – Iċ-champions renjanti Hamrun Spartans, li ġejjin minn telfa ta’ 1-0 kontra Gzira United, jiffaċċjaw lil Gudja United li wkoll sfaw megħluba, bl-iskor ta’ 2-0 minn Birkirkara b’doppjetta ta’ Leandro Aguirre.
Il-pressjoni qed tiżdied fuq l-Ispartans u fuq il-coach tagħhom Mark Buttigieg wara li sofrew ir-raba’ telfa tagħhom f’sitt logħbiet bil-konsegwenza li jinsabu 10 punti taħt il-leaders.
L-uniku punt pożittiv fil-logħba preċedenti għall- Ħamruniżi kien ir-ritorn tal-midfielder, Matthew Guillaumier, li kien ilu nieqes fl-azzjoni mill-bidu tal-istaġun minħabba li kien imweġġa’.
Fil-veritá ma kienx influwenti bħas-soltu u ftit li xejn ħalla impatt. Iżda jrid jingħata ċ-ċans biex jissetilja u jadatta.
Min-naħa l-oħra, Gudja m’għandhomx x’jitilfu u għaldaqstant m’huma se jkollhom l-ebda forma ta’ pressjoni.
Iżda se jkollhom jgħaddu mingħajr is-servizzi tas-sospiż Igor Dudarev.
Mosta v Floriana – Mosta, li jinsabu fin-naħa t’isfel tal-klassifika, jiltagħu kontra Floriana.
Filwaqt li fl-aħħar partita l-Blues ġew imċaħħda mit- tliet punti proprju fil-ħin miżjud meta Dexter Xuereb kiseb id-draw ta’ 2-2 għal Sta Lucia, il-Greens kisbu rebħa importanti ta’ 2-1 fuq Balzan biex telgħu fit-tielet pożizzjoni.
L-uniku punt negattiv għal Floriana kien it-tkeċċija ta’ Kristian Keqi tard fl-ewwel taqsima meta ġie ordnat iħalli l-ground flimkien mad-difensur ta’ Balzan, Augustine Loof, wara li baqgħu jargumentaw ma’ xulxin wara li ntwerew l-ewwel karta safra.
Min-naħa tagħhom, Mosta jridu jgħollu l-logħba tagħhom biex jieħdu xi ħaġa minn din il-partita hekk kif rebħa tkun ossiġenu ġdid biex jinqalqgħu miż-żona l-ħamra.
Gzira U. v Balzan – Wara li għelbu lil Hamrun Spartans, Gzira United jiżlu b’moral kbir meta jiffaċċjaw lil Balzan li jinsabu fir-raba’ post mill-aħħar.
Iżda rebħa kontra l-Maroons ikun ifisser li jit- biegħdu mill-periklu tar- relegazzjoni.
Min-naħa l-oħra, minkejja li kienu mingħajr id- difensur influwenti, Steve Borg, il-Gżirjani xorta waħda rnexxielhom iżommu clean sheet kontra Hamrun.
L-istess Borg jibqa’ barra mill-azzjoni minħabba li għadu qed jirkupra minn injury fil-groin.
Min-naħa ta’ Balzan, dawn se jkunu mingħajr is-sospiż Augustine Loof kif ukoll mingħajr il-coach, Mark Miller, li aktar kmieni din il-ġimgħa ħabbar ir-riżenja tiegħu.
Sta Lucia v Sliema W. – Din hija partita bejn l-uniċi żewġ timijiet li għadhom qed ifittxu l-ewwel rebħa f’dan l-istaġun.
Sliema Wanderers ġejjin mit-tielet telfa tagħhom meta sfaw megħluba minn Hibernians (3-0).
Kienet wirja diżappuntanti oħra min-naħa tat-team immexxi mill-coach, Andrea Pisanu, b’logħob konfuż u mingħajr l-ebda kreattivitá. Saħansitra anke meta kienu qed igawdu minn superjoritá numerika, wara li tkeċċa Apap, il-Wanderers naqsu li juru xi forma ta’ deteminazzjoni tant li ma ppreżentaw l-ebda theddida serja.
Għall-kuntrarju, Sta Lucia ġew darbtejn minn wara kontra Mosta, u minkejja li lagħbu l-aħħar 18-il minuta bi player inqas wara t- tkeċċija ta’ Jurgen Pisani, huma rnexxielhom itemmu fi draw ta’ 2-2.
Dan huwa konfront bilanċjat u miftuħ għal kull riżultat.
Sirens v Birkirkara – Birkirkara jilagħbu kontra Sirens fit-tentattiv biex iżommu l-pass mal-leaders Hibernians.
L-Istripes jidhru armati tajjeb biex ikomplu jisfidaw għar-rebħ tat-titlu hekk kif l-indikazzjonijiet huma li se tkun battalja bejn żewġ timijiet.
Huma ġejjin minn rebħa ta’ 2-0 fuq Gudja United u għaldaqstant il-moral tagħhom baqa’ għoli biex kontra t-team minn San Pawl il-Baħar, l-Istripes jibdew favoriti li jiksbu t-tliet punti.
Peró huma jridu juru rispett massimu lejn l-avversarji tagħhom li jkunu jridu jpattu għad-diżappunt tat- telfa kontra Valletta bl-iskor ta’ 3-1.
Iżda, meta kienu fi żvantaġġ ta’ 1-0, huma fallew ċans tad-deheb li jiksbu d-draw meta Kemar Reid falla mill-11-il metru.
Birkirkara se jkunu mingħajr is-sospiż Ryan Scicluna wara li tkeċċa kontra Gudja United.
