Bejn illum u għada tintlagħab it-18-il ġurnata tal-Kampjonat Premier fejn il-leaders Hamrun Spartans jinsabu komdi b’vantaġġ ta’ 11-il punt fuq l-eqreb rivali tagħhom.
Filwaqt li huma jilagħbu kontra Floriana, it-team li jinsab fit-tielet post, Birkirkara, għandhom partita diffiċli kontra Valletta biex teżisti possibbiltá li l-Ispartans iżidu l-vantaġġ tagħhom fil-quċċata.
Partita oħra interessanti hija dik bejn Hibernians u Balzan fejn rebħa għal dawn tal-aħħar tkun tfisser li jilħqu lill-istess Pawlisti fir-raba’ post tal-klassifika.
Floriana v Hamrun S. – Hamrun Spartans jiffaċċjaw lil Floriana li ġejjin minn draw ta’ mingħajr goals kontra r-rivali eterni, Valletta.
Fatt interessanti huwa l-fatt li l-Furjaniżi naqsu li joħorġu rebbieħa meta fi tliet okkażjonijiet gawdew minn superjoritá numerika iżda naqsu milli joħorġu rebbieħa … kontra Valletta (0-0), Birkirkara (1-2) u Marsasxlokk (1-1).
Dan minħabba li huma neqsin minn attakkanti li jistgħu jibdlu r-riżultat favur tagħhom. U jekk għandhom attakkant denju, Kemar Reid, se jkun nieqes minħabba li huwa sospiż filwaqt li Andrei Ciolacu ssieħeb ma’ Birkirkara.
Min-naħa ta’ Hamrun Spartans, dawn ġejjin minn rebħa komda ta’ 3-0 biex irreġistraw is-sitt rebħa konsekuttiva u jimmiraw li jkomplu għaddejjin b’din is-sensiela pożittiva biex jersqu aktar lejn ir-rebħ tat-titlu.
Fl-ewwel round, l-Ispartans kienu ħarġu rebbieħa bl-iskor ta’ 2-0.
Valletta v Birkirkara – Valletta jiltaqgħu kontra Birkirkara fejn jimmiraw li jirritornaw għar-rebħ wara tliet draws diżappuntanti bl-aħħar wieħed ikun dak kontra Sirens (3-3) wara li kienu qed igawdu vantaġġ ta’ żewġ goals.
Min-naħa tal-Istripes jimmiraw għar-raba’ rebħa nfila fejn fit-tlieta preċedenti skorjaw disa’ goals u sofrew biss wieħed.
Filwaqt li Valletta għandhom lil Rowen Muscat u Jean Marie Nnomo Ngong sospiżi, Birkirkara se jkunu msaħħa bir-ritorn ta’ Kevin Tulimieri u l-goalkeeper Giacomo Nava.
Fl-ewwel round, Birkirkara kienu rebħu 3-0.
Gudja U. v Sta Lucia – Gudja United jiltaqgħu konra l-ġirien Sta Lucia fejn fl-aħħar ħarġa ż-żewġ timijiet sfaw megħluba bl-iskor identiku ta’ 2-0 … kontra Zebbug Rangers u Sta Lucia rispettivament.
Il-Gudjani ilhom ma jirbħu għal dawn l-aħħar tliet partiti fejn kisbu punt wieħed biex issa qatgħu kull kuntatt mat-timijiet ta’ fuq u għaldaqstant iridu jissetiljaw għal post fin-nofs tal-klassifika.
Min-naħa tal-Luċjani, jinsabu fil-post ta’ qabel l-aħħar u għaldaqstant xejn għajr minn rebħa ma tissodisfa l-kriterji tagħhom fit-tentattiv li jkompli jissieltu kontra r-relegazzjoni.
Gudja se jkollhom jgħaddu mingħajr is-servizzi tas- sospiżi Andre Prates u Hubert Vella filwaqt li Nicholas Pulis se jkun nieqes għal Sta Lucia għall-istess raġuni.
Gudja kienu għelbu lil Sta Lucia 3-1 fl-ewwel round.
Pietá H. v Gzira U. – Gzira United jibdew favoriti li jiksbu t-tliet punti meta jilagħbu kontra t-team ta’ qiegħ il-klassifika, Pietá Hotspurs, li issa ilhom ma jirbħu għal dawn l-aħħar għaxar partiti li fihom kisbu biss żewġ punti.
Min-naħa l-oħra, il-Maroons ilhom ma jitilfu għal dawn l-aħħar ħames logħbiet, b’erba’ rebħiet u draw.
Huma se jkunu mingħajr l-akkwist il-ġdid, Jose Costa Silva Ewertton, li għadhom kif iffirmaw mingħand il-club taċ-Challenge League, Fgura United, minħabba li jinsab sospiż.
Il-Pietaniżi ma jistgħux jużaw lis-sospiż Clinton Bangura.
Fl-ewwel round, il-Gżirjani kienu rebħu bl-iskor ta’ 4-0.
Sirens v Mosta– Mosta jkunu mpenjati fi dwell ma’ Sirens fejn jimmiraw li jżommu l-kuntatt ma’ ta’ fuq.
Iżda huma se jiffaċċjaw team li għandu l-moral għoli wara li fl-aħħar ħarġa salva r-riżultat kontra Valletta wara li kien fi żvantaġġ ta’ żewġ goals.
Iż-żewġ timijiet se jinżlu bl-aqwa formazzjoni possibbli … li fl-ewwel round temmew fi draw ta’ 1-1.
Hibernians v Balzan– Dan huwa konfront delikat bejn żewġ timijiet li jinsabu fil-bżonn tal-punti biex jibqgħu jisfidaw għal post fiż-żona Ewropea.
Filwaqt li Hibernians ġejjin minn telfa ta’ 2-0 kontra Gzira United, Balzan temmew fi draw ta’ bla goals kontra Marsaxlokk.
Iż-żewġ naħat se jinżlu bl-aqwa formazzjoni possibbli fejn il-Balzanin se jkunu msaħħa bir-ritorn ta’ Diver Torres Quintero minn sospensjoni.
Il-Pawlisti kienu għelbu lil Balzan 2-0 fil-konfront dirett tal-ewwel round.
Marsaxlokk v Zebbug R. – Dan huwa konfront dirett u importanti bejn żewġ timijiet li jistgħu jsalvaw iżda fl-istess waqt jistgħu jinqabdu fit-taqbida tar-relegazzoni.
Rebħa għal Zebbug Rabgers tarahom jitilgħu żewġ punti taħt l-istess Marsaxlokk li issa ilhom ma jirbħu għal dawn tal-aħħar disa’ logħbiet fejn kisbu biss erba’ draws.
Marsaxlokk għandhom lil Juan Cruz Aguilar u Oscar Carniello sospiżi filwaqt li r-Rangers għandhom lil Leandro Almeida nieqes għall-istess raġuni.
PROGRAMM KOLLU
Illum
Tony Bezzina Stadium
2.00 pm: Gudja U . v Sta Lucia
4.15 pm: Pietá H. v Gzira U.
National Stadium
2.00 pm: Floriana v Hamrun S.
4.15 pm: Sirens v Mosta
Għada
Tony Bezzina Stadium
2.00 pm: Hibernians v Balzan
4.15 pm: Marsaxlokk v Zebbug R.
National Stadium
3.00 pm: Valletta v Birkirkara
