Minn Cristian Muscat
Marsaxlokk…………..1
Mosta………………….4
Mosta kienu wisq superjuri għal Marsaxlokk biex għelbu l-isfida tagħhom bl-iskor kbir ta’ 4-1, fejn saħansitra li kieku daħkitilhom iktar il-fortuna, l-iskor seta’ faċilment ikun akbar favurihom.
Il-Mostin kienu ferm iktar tattikament dixxiplinati u organizzati f’kull dipartiment tal-ground u impostaw il-logħob tagħhom kif xtaqu, bix-Xlukkajri li kienu qed jirritornaw fil-Premier wara nuqqas ta’ 13-il sena ftit li xejn ħabbtuhom.
Marsaxlokk, li għalihom iddebuttaw seba’ players, urew biċ-ċar li fadlilhom x’jaqdfu biex ikunu ta’ konkorrenza serja u biex iżommu posthom mal-elite tal-football lokali.
Mosta kellhom bidu tajjeb u fl-14-il minuta fetħu l-iskor, meta wara li rċieva minn through pass, CHRIST EMEME xeħet fir-rokna tax-xibka.
Kien goal li ta injezzjoni morali lill-Mostin biex bdew jiddettaw il-logħob u ma kienet l-ebda sorpriża li fil-35 minuta rduppjaw meta Clayton Failla indirizza cross mix-xellug li sab lil CHRIST EMEME li kkonkluda b’xutt fir-rokna tax-xibka.
Kollox beda ġej ħażin għax-Xlukkajri u ħames minuti wara, Mosta rebħu penalty meta Jeferson waqqa’ lil Gianluca Sciberras fil-kaxxa. Mill-11-il metru, CLAYTON FAILLA ma żbaljax.
Iżda kontra x-xejra tal-logħob fit-43 minuta Marsaxlokk irnexxielhom inaqqsu l-marġni tal-iskor meta TIAGO ADAN FONSECA għeleb lill-goalkeeper ta’ Mosta Ini Etim Akpan permezz ta’ xutt fil-baxx.
Fil-50 minuta, Mosta kien sfortunati li ma kabbrux l-iskor meta Linus Precious Tenebe għadda tajjeb lejn Christ Ememe li kellu x-xutt tiegħu jistampa ma’ sieq il-wieqfa.
Fit-80 minuta Marsaxlokk spiċċaw jilagħbu b’10 players meta tkeċċa Adrian Ferraris Santiago bit-tieni ammonizzjoni … biex ftit sekondi wara Mosta reġgħu ġew imċaħħda meta x-xutt b’saħħtu ta’ Zachary Brincat stampa mal-mimduda.
Madankollu żewġ minuti mit-tmiem huma ngħataw penalty ieħor meta l-goalkeeper Xlukkajr, Frederick Tabone, waqqa’ lil Brincat fil-kaxxa … biex CHRIST EMEME xeħet fir-rokna tax-xibka biex irreġistra hat-trick personali.
Marsaxlokk: 1-Frederick Tabone, 2-Timmy Tabone Desira (11-Alfred Effiong 72), 6-Jeferson Mendes Dos Santos (37-Fabian Santiago Moracci 46), 10-Conor Borg (7-Ayrton Attard 46), 14-Walter Omar Serrano, 19-Emerson Vella, 21-Adrian Ferraris Santiago, 25-Oscar Carniello, 77-Wellington Valentim De Sousa, 96-Daniel Agius (22-Dale Mifsud 83), 99-Tiago Adan Fonseca Coach: Pablo Doffo
Mosta: 12-Ini Etim Apkan, 2-Tobi Akiti (77-Zachary Brincat 46), 5-Patrick Mensah, 8-Christ Ememe, 13-Clayton Failla (11-Duane Bonnici 82), 16-Gianluca Sciberras (21-Nathan Agius 59), 24-Michael Okoh Chidera (10-Linus Precious Tenebe 68), 30-Nii Martey Jacob Akrong, 33-Geoffrey Edwin Acheampong (22-Tyrone Farrugia 82), 74-Jake Vassallo, 98-Rodriguez Ekani Coach: Joseph Grech
Referee: Andrea Sciriha
Ass. Referees: Jurgen Spiteri, Vasil Vasilev
Raba’ Uffiċjal: Ezekiel Barbara
Skorers: C. Ememe 14, 35, 87, C. Failla pen. 40 (MST), T. A. Fonseca 43 (MXL)
Tkeċċa: A. Ferraris Santiago 80 (MXL)
Ammoniti: R. Ekani, G. E. Acheampong, Z. Brincat (MST), J. Mendes Dos Santos, A. Ferraris Santiago (2), F. Tabone (MXL)
Player tal-Logħba: Christ Ememe (MST)