Bejn illum u għada tintlagħab is-seba’ ġurnata tal-BOV Kampjonat Premier bi programm mill-aktar interessanti, bl-attenzjoni prinċipali tkun fuq il-leaders Hamrun Spartans li għandhom partita delikata kontra Mosta.
Żewġ partiti oħra li għandhom jiġbdu l-attenzjoni huma dawk – Birkirkara v Marsaxlokk u Gzira United v Valletta.
Hibernians, it-team l-aktar li ddiżappunta s’issa, jaffronta lil Gudja United filwaqt li Floriana jiffaċċjaw lil Sirens.
Min-naħa tagħhom, Balzan u Sliema Wanederers jilagħbu kontra żewġ timijiet li jinsabu fiż-żona tar-relegazzjoni, Naxxar Lions u Sta Lucia rispettivament.
Hamrun S. v Mosta – Il-leaders assoluti, Hamrun Spartans, jilagħbu kontra Mosta li ġejjin minn żewġ rebħiet, kontra Birkirkara (2-0) u Marsaxlokk (3-2) u għaldaqstant issa jippruvaw iwaqqfu l-mixja pożittiva tal-Ispartans.
F’dan l-istaġun, il-Ħamruniżi waqqgħu biss il-punti fid-draw ta’ 1-1 kontra Sliema Wanderers u jidhru li se jirrepetu s-suċċess tas-sena li għaddiet minħabba li huma l-aktar konsistenti u kompatti … saħansitra anke meta ma jkunux għall-altezza tagħhom xorta waħda jirnexxielhom jiksbu dak li jkunu jridu.
Huma jittamaw li l-attakkant Luke Montebello jkompli bil-forma tiegħu fejn jinsab fil-quċċata tal- lista tal-iskorers b’total ta’ sitt goals fejn irnexxielu jsib ix-xibka avversarja f’erba’ partiti.
Filwaqt li t-team immexxi mill-coach, xxx, ma għandux problemi ta’ players neqsin, Mosta se jkollhom jgħaddu mingħajr is-sospiż Damian Aneni Evans.
Birkirkara v Marsaxlokk– Dan huwa konfront bejn żewġ timijiet li jinsabu fit-tielet post tal-klassifika flimkien ma’ Sliema Wanderers.
Filwaqt li fl-aħħar ħarġa tagħhom Birkirkara rritornaw għar-rebħ wara t- telfa ta’ 2-0 kontra Mosta, Marsaxlokk ġejjin minn żewġ telfiet kontra Valletta (1-0) u kontra Mosta (3-2) u għaldaqstant huwa mperattiv li f’din il-partita ma joħorġux b’idejhom vojta minħabba li jibdew jaqtgħu l-kuntatt mat-timijiet ta’ fuqhom hekk kif jinsabu f’pożizzjoni tajba li jisfidaw għall-ewwel erba’ postijiet.
L-Istripes jinżlu b’moral għoli wara r-rebħa impressjonanti ta’ 3-0 fuq Balzan li ma kellhomx risposta għal-logħob tagħhom.
Huma mistennija jinżlu bl-aqwa formazzjoni possibbli filwaqt li Marsaxlokk se jkunu msaħħa bir-ritorn ta’ Jacob Walker minn sospensjoni.
Gzira U. v Valletta – Din il-logħba bejn żewġ timijiet li jinsabu fin-nofs tal-klassifika, għandha tkun waħda bilanċjata u miftuħa għal kull riżultat … u żball jista’ jkun determinanti fejn imorru l-punti.
Iż-żewġ timijiet ġejjin minn telfa – Gzira United kontra Sliema Wanderers (0-1) filwaqt li Valletta sfaw megħluba minn Hamrun Spartans (2-1) fejn anke fallew penalty.
Għaldaqstant rebħa għal Valletta ttellagħhom aktar ‘il fuq fil-klassifika iżda rebħa għall-Maroons tarahom jaqbżu lill-istess Lilywhites.
Thiago Espindola jirritorna għal Gzira minn sospensjoni.
Hibernians v Gudja U. – Xejn għajr minn rebħa ma tissodisfa lil Hibernians kontra Gudja United hekk kif jinsabu punt wieħed biss fuq iż-żona l-ħamra.
Il-pressjoni tinsab kollha fuqhom u bl-ebda mod ma jistgħu jfallu … minħabba li ilhom erba’ partiti ma jirbħu.
Min-naħa tagħhom, l- aħħar rebħa li l-Gudjani rreġistraw fl-ogħla diviżjoni kienet 14-il partita ilu, jew aħjar, mill-4 ta’ Frar li għadda, meta kienu għelbu lil Sta Lucia bl-iskor ta’ 3-0.
Il-Pawlisti ma jistgħux jinkludu lit-tliet players, Ferdinando Apap, Bjorn Kristensen u Zachary Grech għax jinsabu sospiżi filwaqt li Marvin Angulo Perea jirritorna għall-Gudjani.
Floriana v Sirens – Wara bidu mill-aktar pożittiv fejn kienu qed jaqsmu l-ewwel post ma’ Hamrun Spartans għal ħames ġimgħat, Floriana ħadu falza stikka fl-aħħar żewġ ħarġiet, fid-draws identiċi ta’ 1-1 kontra Naxxar Lions u Gudja United, biex fallew erba’ punti mill-aktar importanti meta fuq il-karta kienu favoriti.
Il-Greens jaffrontaw lil Sirens li, bħalissa huma team ferut, u li jinsabu ferm ‘il bogħod mill-forma ta’ dawn l-aħħar tliet snin li għamlithom team stabbilit fl-ogħla diviżjoni.
Huma qed ifittxu l-ewwel rebħa meta għandhom biss żewġ punti u f’periklu serju tar-relegazzjoni.
Floriana għandhom lil Matias Nicolas Garcia sospiż.
Sta Lucia v Sliema W. – Sliema Wanderers jibdew favoriti li jiksbu t-tliet punti kontra Sta Lucia li wkoll qed ifittxu l-ewwel rebħa.
Il-Wanderers jimmiraw li jkomplu għaddejjin bis-sensiela pożittiva li minkejja li mhux qed jiskorjaw ħafna, qed jilħqu l-objettiv tagħhom bil-konsegwenza li jaqsmu t-tielet post.
Huma se jkunu msaħħa bir-ritorn ta’ Geoffrey Acheampong minn sospensjoni.
Balzan v Naxxar L. – Balzan joħorġu bħal iljuni kontra Naxxar Lions wara li fl-aħħar ħarġa sfaw megħluba bl-iskor “kbir” ta’ 3-0 kontra Birkirkara u għaldaqstant jimmiraw li jirritornaw għar-rebħ biex jibqgħu sfidanti denji għal post mal-ewwel erbgħa.
Iżda wara li żammew fi draw lil Floriana (1-1) u lil Hibernians (0-0), in-Naxxarin bħal donnhon jafu l-formula biex jiffrustraw lit-timijiet il-kbar.
