Minn Cristian Muscat
Bejn illum u għada jirritorna l-BOV Kampjonat Premier wara l-waqfa ta’ ġimagħtejn minħabba l-impenji tat-team nazzjonali fir-round ta’ kwalifikazzjoni tal-Euro 2024.
Bla dubju, l-aktar żewġ partiti li jispikkaw huma Hamrun Spartans v Sliema Wanderers u Hibernians v Balzan. Minn dak li rajna s’issa, dawn iż-żewġ partiti huma miftuħa għal kull riżultat.
Floriana, li qed jaqsmu l-ewwel post mal-Ispartans, jibdew favoriti kontra Naxxar Lions filwaqt li Birkirkara jaffrontaw lill-ġirien Mosta.
Żewġ partiti bilanċjati huma dawk bejn Marsaxlokk u Valletta, u Gzira United kontra Sirens filwaqt li Sta Lucia u Gudja United jiltaqgħu f’logħba diretta li tirrigwardja n-naħa t’isfel tal-klassifika.
Hamrun S. v Sliema W. – F’konfront mill-aktar delikat, iċ-champions renjanti Hamrun Spartans jaffrontaw lit-team promoss ta’ Sliema Wanderers li jimmeritah aħjar mis-sitt post attwali tal-klassifika.
Dan minħabba li s’issa huma wrew il-potenzjal tagħhom li kapaċi wkoll jisfidaw għal post mal-ewwel erbgħa.
Filwaqt li jittamaw li l-aqwa skorer s’issa, Luke Montebello, jkun fil-forma, il-Ħamruniżi jimmiraw għall-ħames rebħa konsekuttiva u li jżommu x-xibka tagħhom bla mittiefsa li, flimkien ma’ Floriana, għadhom ma sofrew l-ebda goals.
Filwaqt li huma ġejjin minn rebħa komda ta’ 4-0 fuq Sirens, is-Slimiżi jinżlu biex ipattu għat-telfa ta 1-0 kontra Marsaxlokk.
Huma se jkunu mingħajr is-sospiż, Neil Frendo.
Hibernians v Balzan – Din hija partita bejn żewġ timijiet li ġejjin minn telfa, Hibernians kontra Birkirkara (1-0) u Balzan kontra Floriana (3-0) u għaldaqstant ma jaffordjawx joħorġu b’idejhom vojta jekk iridu jżommu l-kuntatt mat-timijiet ta’ fuq kif ukoll jisfidaw għal post mal-ewwel erbgħa li jfisser kwalifikazzjoni għall-UEFA Conference League.
Għall-Pawlisti mistenni jirritorna Alex De Souza Silva filwaqt li Balzan se jkollhom jgħaddu mingħajr iż-żewġ players sospiżi, Andre Prates u Paul Fenech.
Floriana v Naxxar L. – Floriana jimmiraw li jkomplu għaddejjin bis-sensiela ta’ rebħiet infila meta jiffaċċjaw lil Naxxar Lions li ġejjin minn rebħa kbira ta’ 4-0 fuq Sta Lucia u għaldaqstant jinżlu b’moral għoli wara bidu ta’ żewġ telfiet u draw.
Dan huwa test diffiċli għalihom hekk kif iridu jakkwistaw il-punti neċessarji biex iżommu posthom mal-kbar.
Min-naħa ta’ Floriana, taħt it-tmexxija tal-coach, Mauro Camoranesi, bħal donnhom qabdu l-konsistenza iżda jridu juru rispett massimu lejn in-Naxxarin li jinżlu biex jirreġistraw sorpriża.
L-aħħar darba li l-Lions għelbu lil Greens kien nhar il-15 ta’ Novembru, 1999, bl-iskor ta’ 3-0.
Iż-żewġ timijiet mistennija jinżlu bl-aqwa formazzjoni possibbli.
Birkirkara v Mosta – Birkirkara jiffaċċjaw lil Mosta li ġejjin minn draw ta’ 1-1 kontra Valletta.
Fil-veritá kien mistenni aktar mill-Mostin u s’issa ddiżappuntaw bil-kbir meta fl-istaġun preċedenti kienu sfida denja, tant, li saħansitra resqu viċin li jidħlu fil-play-off għall-kwalifikazzjoni għall-UEFA Conference League.
Iżda ġew eliminati minnha minħabba l-inferjoritá tal-konfronti diretti ma’ Balzan u Hibernians.
Sa ċertu punt, anke Birkirkara ddiżappuntaw meta, wara li ntlagħbet ir-raba’ ġurnata, huma jinsabu ħames punti taħt il-leaders.
Għaldaqstant ma jistgħu jwaqqgħu aktar punti.
Id-difensur Manuel Pena Beltre mistenni jirritorna wara li tilef il-logħba kontra Hibernians.
Marsaxlokk v Valletta – It-team rivelazzjoni s’issa, Marsaxlokk, jaffronta lil Valletta li se jkunu mmexxija mill-coach il-ġdid, Enzo Potenza, wara li waqqfu l-kuntratt ta’ Thane Micallef.
Jekk Potenza huwa ġdid għall-Beltin, bla dubju, ma għandu bżonn tal-ebda introduzzjoni fil-logħba domestika meta mexxa lil Senglea Athletic, Floriana u Sta Lucia fl-ogħla diviżjoni … kif ukoll lil Marsa fiċ-Challenge League.
Ironikament huwa mexxa lir-rivali eterni, Floriana, għar-rebħ tat-titlu.
Potenza jrid jagħraf kif jirriorganizza u jimmotiva lill-players tiegħu wara li fit-tliet partiti preċedenti huma kisbu biss żewġ punti.
Min-naħa ta’ Marsaxlokk, dawn fallew biss żewġ punti minn erba’ partiti biex jinsabu pass wara l-leaders fil-quċċata.
Iżda huma se jkunu mingħajr is-sospiż, Anthony Abah Obonogwu.
Gzira U. v Sirens– Din hija partita min-naħa t’isfel tal-klassifika fejn huwa mperattiv li ż-żewġ timijiet jiksbu t-tliet punti.
Rebħa għall-Maroons tħalli lil Sirens fiż-żona l- ħamra filwaqt rebħa għall-Pawlini ttellagħhom b’punti daqs Gzira.
Iż-żewġ timijiet għandhom player sospiż – Gabriel Bohrer Mentz għal Gzira u Daniel Opoku għal Sirens.
Sta Lucia v Gudja U. – Din hija logħba bejn żewġ timijiet li għadhom qed ifittxu l-ewwel rebħa u li jidher li se jkollhom staġun mill-aktar diffiċili biex iżommu l-profil tagħhom fil-Kampjonat Premier.
Kemm Sta Lucia kif ukoll Gudja United iridu jirkupraw mit-telfiet kbar li sofrew kontra Naxxar Lions (4-0) u Gzira United (6-1) rispettivament.
Telfa tkun tfisser li jkomplu jgħoddsu lejn il-qiegħ tal-klassifika.
