Eluf ta’ passiġġieri spiċċaw maqbuda fl-ajruporti madwar l-Istati Uniti wara ħsara fis-sistema tal-kontroll tat-traffiku tal-ajru, li wasslet biex għal aktar minn erba’ sigħat twaqqfu t-tluq tat-titjiriet madwar il-pajjiż.
Il-ħsara kienet ikkawżata minn problemi tekniċi li affettwaw is-sistemi ta’ komunikazzjoni u tar-radar.
Minkejja li t-titjiriet setgħu jerġgħu jibdew jitilqu l-Ġimgħa filgħaxija, matul is-Sibt ġew ikkanċellati aktar minn 2,500 titjira, filwaqt li mijiet oħra kellhom dewmien.
L-awtoritajiet Amerikani kkonfermaw li aktar minn 3,000 ajruplan li kienu diġà fl-ajru niżlu b’mod sigur.
L-impatt ta’ din il-ħsara mistenni jibqa’ jinħass għal diversi jiem, hekk kif il-linji tal-ajru qed jaħdmu biex jirritornaw għan-normal.
