Franza ħadu skoss qawwi fit-tentattiv li jiddenfedu t-titlu ta’ champions tad-dinja meta ħarġet l-aħbar li Karim Benzema, li għadu kif rebaħ il-Ballun tad-Deheb, se jitlef it-Tazza tad-Dinja wara injury fil-koxxa li sofra waqt it-taħriġ, nhar is-Sibt.
Din l-injury li sofra l-player ta’ 34 sena teħtieġ tliet ġimgħat ta’ konvalexxenza.
L-attakkant ta’ Real Madrid ilu jissielet bi problema fil-koxxa minn Ottubru u lagħab inqas minn nofs siegħa ta’ football fl-aħħar sitt logħbiet tal-club tiegħu.
Benzema għadda minn testijiet mediċi wara li ħalla t-taħriġ imweġġa’ nhar is-Sibt qabel il-partita kontra l-Awstralja.
Din kienet l-ewwel darba li Benzema ħa sehem f’taħriġ sħiħ minn meta l-iskwadra ta’ Didier Deschamps iltaqgħet fil-kwartieri ġenerali fi Clairefontaine, nhar it-Tnejn li għadda.
Skont ir-regoli tal-FIFA, il-coach Didier Deschamps jista’ jsejjaħ sostitut għal plejer imweġġa’ sa nhar it-Tnejn, lejlet l-ewwel logħba tagħhom kontra l-Awstralja.
L-injury ta’ Benzema hija wġigħ ta’ ras kbira għal Deschamps, diġà mċaħħad mis-servizzi tal-midfielders Paul Pogba u N’Golo Kante, il-goalkeeper numru tnejn Mike Maignan, id-difensur Presnel Kimpembe u l-attakkant Christopher Nkunku.
Benzema, li x-xahar li għadda rebaħ il-Ballun tad-Deheb, ilu ma jilgħab partita sħiħa mid-19 ta’ Ottubru.
Hu u Raphael Varane tħarrġu apparti l-kumplament tal-iskwadra nhar il-Ħamis waqt sessjoni miftuħa għall-midja.
Id-difensur ċentrali ta’ Manchester United, Varane, ilu ma jilgħab minn meta sofra injury kontra Chelsea, fit-22 ta’ Ottubru.
