Uliedek għandhom id-delizzju tal-logħob virtwali? Tajjeb! Imma qed taħseb li qegħdin iqattgħu ħin eċċessiv waqt tali attività? Normali li taħseb dan! Għan ewlieni tal-Fondazzjoni hu li jitressqu pariri żgħar imma siewja lill-ġenituri hemm barra biex kemm jista’ jkun jinħoloq dak il-famuż bilanċ, speċjalment f’każijiet fejn tkun qed tirrenja l-eċċessività li taf twassal għal riperkussjonijiet fiżiċi, soċjali, konjittivi u mentali.
Ippjanaw u ssettjaw screen time limits li jkunu ċari għal kulħadd. Stabilixxi regoli biex jitnaqqas il-ħin quddiem l-iskrin waqt dan il-logħob. Iddeċiedi kemm sigħat uliedek se jqattgħu quddiem l-iskrin u żomm nota ta’ dan il-ħin fil-ġimgħa, fejn hekk tkun qed toħloq rutina biex uliedek isibu ħin għal kollox! Dan il-limitu ovvjament irid ikun ibbażat skond l-età, l-istadju tal-iżvilupp u l-bżonnijiet speċifiċi.
Elimina dak li nsejħulu Background TV … tinstallax televiżjonijiet jew skrins b’consoles fil-kmamar ta’ wliedek jekk għadhom taħt l-età.
Tgħallem ħu pjaċir waqt il-ħin tal-logħob ma’ wliedek, interessa ruħek dwar it-tip ta’ logħob li qed jilagħbu u saħansitra sib ħin biex tilgħab logħob virtwali magħhom. Għallem lil uliedek il-paċenzja li jistennew jekk toħroġ logħba ġdida u jkunu jriduha. Inkoraġixxi l-attività fiżika li ma tirrekjedix skrins. Ippjanaw attivitajiet oħrajn li ma jinkludux skrins ġewwa d-dar bħal qari, tpinġija, board games. Dawn l-attivitajiet jgħinu lit-tfal jiżviluppaw kreattività, ħsieb kritiku u abbiltajiet ta’ problem-solving.
Agħmel moniteraġġ kontinwu tal-attività, permezz ta’ parental controls fuq l-apparat. Kun af ma’ min qed jilagħbu u x’tip ta’ lingwaġġ qed jintuża. Għarraf lil uliedek jagħrfu mumenti ta’ cyberbullying u ħeġġiġhom jikkomunikaw u anke jekk hemm bżonn jirrapportaw.
Dejjem agħti eżempju quddiem uliedek u dejjem aqsam ħsibijietek ma’ ġenituri oħrajn biex dejjem iżżomm ruħek aġġornat bl-aħħar informazzjoni u aħbarjiiet.
Sadanittant ħeġġeġ lil uliedek biex jinqatgħu mit-teknoloġija għal siegħa, jum jew saħansitra ġimgħa u agħtihom premju xieraq jekk jirnexxilhom jagħmlu dan.
Jekk ġenitur iħossu li għandu bżonn aktar informazzjoni f’dan ir-rigward jista’ jagħmel użu mil-linja ta’ sapport nazzjonali 1777, jew inkella jagħmel użu miċ-chatline fuq il-websajt tagħna www.rgf.org.mt.
Ritratt: TIMA MIROSHNICHENKO (PEXELS.COM)
