Għadd ta’ gruppi li jirrappreżentaw komunitajiet ta’ ċittadini minn pajjiżi terzi (TCNs) f’Malta, bl-appoġġ tal-General Workers’ Union (GWU), qed jingħaqdu mas-Servizz Nazzjonali tat-Trasfużjoni tad-Demm biex iniedu inizjattiva ġdida li tħeġġeġ l-għoti regolari tad-demm u tgħin lil dawk li jkunu fil-bżonn.
Din l-inizjattiva tħabbret waqt ir-raba’ ċelebrazzjoni kbira ta’ Krishna Janmashtami li ttellgħet fil-GWU u li laqqgħet flimkien membri minn komunitajiet differenti li jgħixu u jaħdmu f’Malta.
Mission Love All Serve All, Satya Sanatan Dharma Sabha Malta, Nirankari Mission u TCN Voice Malta, flimkien ma’ membri oħra tal-komunitajiet ta’ TCNs, se jkunu qed jieħdu sehem f’din l-inizjattiva.
Bħala parti minn dan l-impenn, il-gruppi parteċipanti għandhom l-għan li jorganizzaw sessjoni ta’ għoti tad-demm kull xahar, filwaqt li jħeġġu lill-membri tal-komunitajiet differenti ta’ TCNs biex jagħtu d-demm b’mod regolari. L-inizjattiva se tfittex ukoll li tqajjem aktar għarfien fost il-komunità usa’ dwar l-importanza tal-għoti tad-demm.
L-inizjattiva ġiet diskussa ma’ Caroline Cassar mis-Servizz Nazzjonali tat-Trasfużjoni tad-Demm, bil-gruppi parteċipanti jesprimu r-rieda tagħhom li jaħdmu flimkien biex iħeġġu lil dawk eliġibbli jsiru donaturi regolari tad-demm.
Il-GWU tilqa’ din l-inizjattiva bħala eżempju pożittiv ieħor ta’ kif komunitajiet differenti jistgħu jingħaqdu għal għan komuni u jagħtu kontribut siewi lis-soċjetà Maltija.
“L-għoti tad-demm huwa att ta’ solidarjetà li jmur lil hinn min-nazzjonalità, l-oriġini jew il-komunità li wieħed jagħmel parti minnha. Permezz ta’ din l-inizjattiva, il-komunitajiet ta’ TCNs qed iwasslu messaġġ b’saħħtu li kulħadd jista’ jagħti sehmu biex jgħin lil ħaddieħor u jappoġġja pazjenti li jista’ jkollhom bżonn id-demm waqt trattament mediku jew f’każ ta’ emerġenza,” qal is-Segretarju Ġenerali tal-GWU Kevin Camilleri.
Il-GWU temmen li inizjattivi bħal dawn isaħħu wkoll il-parteċipazzjoni, l-integrazzjoni u s-sens ta’ responsabbiltà soċjali komuni fost il-komunitajiet differenti li jiffurmaw parti mis-soċjetà Maltija.
Id-dettalji dwar l-ewwel sessjoni ta’ għoti tad-demm se jitħabbru dalwaqt.
Il-GWU tħeġġeġ lil dawk kollha li huma eliġibbli biex jagħtu d-demm sabiex jappoġġjaw din l-inizjattiva u jgħinu biex tkompli tissaħħaħ kultura ta’ solidarjetà u għajnuna reċiproka fost il-komunitajiet f’Malta.
