Hekk kif dalgħodu dan is-sit ippubblika rapport fejn fih ta d-dettalji ta’ kif kien kienet għaddejja l-ħidma biex jifforma l-Kabinett il-ġdid tal-Prim Ministru Robert Abela, illum wara nofsinhar ġie kkonfermat il-Kabinett il-ġdid. Dan se jkun Kabinett bi 18-il Ministru u erba’ Segretarji Parlamentari
Għall-ħabta tat-3.30p.m. se jkun qiegħed jieħu l-ġurament tal-ħatra l-kabinett tal-Ministri, wara l-għażla demokratika tal-poplu fl-Elezzjoni Ġenerali tas-26 ta’ Marzu.
Kif imwiegħed tul il-kampanja elettorali, il-Prim Ministru Robert Abela għażel kabinett li jinkludi taħlita ta’ esperjenza u demm ġdid. Fil-fatt f’dan il-Kabinett, waqt li hemm uħud li żammu d-dekasteru li kellu, kien hemm oħrajn li kellhom tibdil u dan anke minħabba l-fatt li kien hemm Ministri mil-leġiżlatura ta’ qabel.
Il-mira ewlenija ta’ dan il-kabinett hi li jitwettaq il-manifest elettorali li fuqu kien elett il-gvern, manifest elettorali mibni fuq il-ħtieġa ta’ Malta isbaħ, opportunitajiet indaqs għal kulħadd u kwalità ta’ ħajja aħjar.
Il-Prim Ministru Robert Abela ta permess temporanju għal ftit jiem lill-Kirurgu Jo Etienne Abela biex ikun jista’ jopera pazjenti li diġà għamlu tħejjija għall-operazzjoni. Dan fl-interess tas-saħħa tal-istess pazjenti.
Il-Prim Ministru se jikkunsidra wkoll ħatriet oħra, fid-dawl tal-ħtieġa li bħalma se tissaħħaħ ir-rappreżentanza femminili fil-Parlament, tissaħħaħ ukoll fl-eżekuttiv.
Dawn huma l-Ministri fil-Kabinett:
- Robert Abela – Prim Ministru
- Chris Fearne – Deputat Prim Ministru u Ministru għas-Saħħa
- Owen Bonnici – Ministru għall-Wirt Nazzjonali, l-Arti u l-Gvern Lokali
- Ian Borg – Ministru għall-Affarijiet Barranin u Ewropej u l-Kummerċ
- Michael Falzon – Ministru għall-Politika Soċjali u d-Drittijiet tat-Tfal
- Anton Refalo – Ministru għall-Agrikoltura, is-Sajd u d-Drittijiet tal-Annimali
- Roderick Galdes – Ministru għall-Akkomodazzjoni Soċjali u Affordabbli
- Silvio Schembri – Ministru għall-Ekonomija, il-Fondi Ewropej u l-Artijiet
- Julia Farrugia Portelli – Ministru għall-Inklużjoni, il-Volontarjat u d-Drittijiet tal-Konsumatur
- Aaron Farrugia – Ministru għat-Trasport, l-Infrastruttura u l-Proġetti Kapitali
- Clint Camilleri – Ministru għal Għawdex
- Byron Camilleri – Ministru għall-Intern, is-Sigurtà, ir-Riformi u l-Ugwaljanza
- Clayton Bartolo – Ministru għat-Turiżmu
- Miriam Dalli – Ministru għall-Ambjent, l-Enerġija u l-Intrapriża
- Clyde Caruana – Ministru għall-Finanzi u x-Xogħol
- Clifton Grima – Ministru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni
- Stefan Zrinzo Azzopardi – Ministru għax-Xogħlijiet Pubbliċi u l-Ippjanar
- Jonathan Attard – Ministru għall-Ġustizzja
- Jo Etienne Abela – Ministru għall-Anzjanità Attiva
Segretarji Parlamentari
Andy Ellul: Segretarju Parlamentari għad-Djalogu Soċjali fl-Uffiċċju tal-Prim Ministru
Alison Zerafa Civelli: Segretarju Parlamentari għall-Gvern Lokali fil-Ministeru għall-Wirt Nazzjonali, l-Arti u l-Gvern Lokali
Chris Bonnett: Segretarju Parlamentari għall-Fondi Ewropej fil-Ministeru għall-Ekonomija, l-Fondi Ewropej u l-Artijiet
Keith Azzopardi Tanti: Segretarju Parlamentari għaż-Żgħażagħ, ir-Riċerka u l-Innovazzjoni fil-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni
