Sa minn kmieni dalgħodu għadd kbir ta’ persuni rħewlha lejn San Ġiljan biex jitlaqqmu kontra l-Covid-19 fil-mobile clinic.
Ritratti ta’ dan is-sit jixhdu kif reġa’ hemm konkorrenza għat-tilqim fl-irħula hekk kif mit-Tnejn li għadda beda t-tilqim mingħajr appuntament u anki klinika li ddur minn post għall-ieħor qed tmur fil-lokalitajiet madwar il-pajjiż.
It-Tnejn li għadda din il-mobile clinic kienet qiegħda toffri dan is-servizz mill-Mosta u tlaqqmu kważi 2,500 persuna. L-Erbgħa din il-mobile clinic ġiet trasferita lejn il-pjazza taż-Żejtun u hemmhekk ukoll kien hemm konkorrenza qawwija fejn tlaqqmu 1,824 persuna.
Intant illum mistennija tkompli tiżdied ir-rata ta’ dawk imlaqqmin u dan hekk kif minn dalgħodu kmieni dehru għadd ta’ persuni jiffurmaw kjuwijiet biex jitlaqqmu.
Fil-post hemm numru ta’ uffiċjali li qegħdin jiggwidaw lil dawk preżenti anke biex jassiguraw li jiġu mħarsa l-miżuri tad-distanza soċjali.
