L-attivisti Morgane Chapman u Phoebe Horrocks, mill-Ingilterra, qed jitolbu regolamenti aktar stretti fil-professjoni tal-għalliema tas-sewqan wara li ġew abbużati sesswalment mill-għalliem preċedenti tagħhom.
Michael Florek instab ħati ta’ ħames każijiet ta’ abbuż sesswali li seħħew bejn l-2016 u l-2021. Aktar tard miet b’suwiċidju. L-għaqda FearFree, ibbażata f’Wiltshire u li tikkampanja kontra l-abbuż sesswali, sostniet li t-tfal għandhom “jingħataw l-istess protezzjoni f’karozza bħalma jkollhom f’klassi.” L-organizzazzjoni nediet il-petizzjoni tagħha Emergency Stop, li qed titlob miżuri ta’ protezzjoni aktar b’saħħithom fis-settur.
Fil-bidu tal-lezzjonijiet tas-sewqan tagħhom, Phoebe u Morgane ma kinux jafu lil xulxin, allavolja kellhom l-istess għalliem. Phoebe, li kellha 18-il sena dak iż-żmien, qalet: “Deher edukat. Deher bħal raġel normali.” Morgane, li kellha 17-il sena, qalet li l-esperjenza tagħha kienet simili ħafna.
Skont iż-żewġ nisa, Michael inizjalment kellimhom b’mod kalm u professjonali qabel ma l-imġiba tiegħu saret predatorja. “Huwa abbużani diversi drabi matul dik l-ewwel lezzjoni,” stqarret Phoebe. Morgane fakkret f’mistoqsijiet intrużivi kif ukoll atti li muhmiex xieraq ta’ natura sesswali waqt il-lezzjonijiet tagħha.
Wara rapporti lill-awtoritajiet, Florek ingħata sentenza sospiża u ġie pprojbit milli jaħdem bħala għalliem tas-sewqan għal 10 snin.
Issa, l-attivisti qed jitolbu verifiki aktar stretti tal-isfond u politiki ta’ salvagwardja aktar b’saħħithom biex jipproteġu aħjar iż-żgħażagħ li qed jitgħallmu jsuqu.
