Bħalissa l-coach ta’ Udinese, Kosta Runjaic, jinsab fuq fomm kulħadd fl-Italja, hekk kif bħalissa jinsabu fil-quċċata tal-klassifika wara li nhar it-Tnejn irkupraw żvantaġġ ta’ żewġ goals u għelbu lil Parma bl-iskor ta’ 3-2.
Il-coach ta’ 53 sena, li għandu nazzjonalità Ġermaniża minkejja li twieled fi Vjenna, ġie mqabbad minn Udinese f’Ġunju li għadda, wara li tkeċċa fit-tieni staġun tiegħu mill-club Pollakk ta’ Legia Warsaw.
Il-wasla ta’ Runjaić fid- Dacia Arena mmarkat l-ewwel esperjenza tiegħu bħala coach fl-ewwel diviżjoni ta’ wieħed mill-aqwa ħames kampjonati Ewropej.
Esperjenzi preċedenti fi Duisburg, Kaiserslautern, u 1860 Munich kienu kollha ma’ clubs Ġermaniżi jilagħbu fit-tieni livell.
Runjaic xejn ma kien magħruf meta Udinese iddeċidew li jafdawlu t-tmexxija tat-team f’Ġunju li għadda wara li l-Bianconeri bidlu tliet coaches fi staġun wieħed hekk kif kienu qed jiġġieldu għas-salvazzjoni.
Minkejja li matul is-sajf li għadda Udinese ftit li xejn kienu attivi fis-suq tat-trasferimenti, Runjaic addatta l-istil offensiv biex it-team qed jiggwadanja minnu.
Huwa qed jiġi segwit minn bosta clubs bil-konsegwenza li f’Ġunju jista’ jħalli lill-Friulani.
