Kuntentizza ċara fuq wiċċ ir-residenti ta’ Dar Nazareth

Ix-xogħol tal-ġurnaliżmu jiftaħlek dinja ġdida u jlaqqgħek ma’ diversi persuni nklużi dawk distinti u popolari li intervisti magħhom huma parti minn xogħlok. Iżda, is-sabiħ tax-xogħol tagħna mhuwiex li tħossok importanti għax qiegħda wiċċ imb’wiċċ ma’ personalitajiet jew politiċi kbar, imma li tkun fost nies minn kull mixja tal-ħajja li jgħixu ċirkostanzi differenti. Dawn, barra li jgħallmuk u jiftħulek għajnejk għal ħafna sitwazzjonijiet, jgħinuk anke tikber professjonalment u fil-formazzjoni personali. Xi drabi, tiġik ix-xorti li wkoll jimlulek qalbek bil-ferħ. 

Hekk kienet l-esperjenza tagħna f’Dar Nazareth fiż-Żejtun wara li tkellimna ma’ Dun Anġ Seychell dwar il-maratona ta’ ġbir ta’ fondi “Bis-Saħħa ta’ Kulħadd”. Kif poġġejna fuq il-mejda tal-kċina mdawwra b’uħud mir-residenti, li għall-bidu kienu xi ftit mistħija, innotajna li ma damux biex ħassewhom komdi biżżejjed magħna. Dawn bejn ċajta, kelma ta’ wens u attenzjoni xierqa, saħansitra ħassewhom kuntenti jitkellmu magħna tant li kważi kważi ma rieduniex li nitilqu. 

Fin-nofs siegħa li qattajna nitkellmu magħhom poġġewlna fuq wiċċna tbissima liema bħalha u hawn nifhmu lil Dun Anġ… Nifhmu l-missjoni tiegħu, l-imħabba li jħoss, kif ukoll il-grinta li għandu biex jgħin lil dawn il-persuni b’diżabilità. 

Aktar milli naraw id-diżabilità, għandna naraw l-abbiltà kbira li għandhom dawn l-anġli li juru mħabba ġenwina lejn il-proxxmu u l-imħabba li għandhom lejn il-ħajja li hija bi dritt tagħhom. Dawn huma l-kummenti minn tmien residenti f’Dar Nazareth bi tnejn minnhom jesprimu xewqat żgħar li nittamaw xi ħadd ikun ta’ qalb tajba biżżejjed biex jagħmlilhom realtà:

Tessie Galea: 

Tessie għandha 63 sena u hija oriġinarjament mill-Birgu. Hija kienet tgħix Raħal Ġdid u għandha żewġ ħutha bniet Doris u Nina u ħuha Pawlu li jgħix il-Kanada. L-hena tagħha huma x-xogħol tas-suf u t-tpinġija. Tessie tbati biex timxi.

Sandra Bonnici:

Sandra għandha 54 sena u hija Żejtunija. Jogħobha ħafna li tgħix f’Dar Nazareth u l-hena tagħha tnaddaf. Hija mara xummiema li ħadd ma jista’ jmissilha l-ħasil tal-platti u t-tiwi tal-ħwejjeġ. Sandra ilha tgħix f’din ir-residenza mal-20 sena u hija waħda minn tal-bidunett.

Joseph Fabri:

Għandu 50 sena u huwa minn San Ġwann. Joseph ilu jgħix f’Dar Nazareth għal dawn l-aħħar sentejn. Kien jgħix mal-ġenituri tiegħu sakemm dawn kibru fl-età u riedu jsibulu post u ambjent fejn seta’ jingħata l-kura u l-attenzjoni li kellu bżonn. Huwa tifel waħdu. L-aktar ħaġa li tispikka fih hija t-tbissima kbira u kontinwa fuq wiċċu. Minn kliem il-carer, ‘Joseph dejjem jidħak, jinbex u jiġri magħna’.

Martin Rotin:

Martin għandu 37 sena u għandu l-kundizzjoni tal-Awtiżmu. Huwa kwiet ħafna u indipendenti sew tant li jmur waħdu b’tal-linja r-Rabat għand ommu. Minħabba li ma jikkomunikax ħafna l-carer qaltilna li Martin iħobb jirranġa l-affarijiet tiegħu b’mod organizzat u sistematiku ħafna. Huwa ilu madwar 19-il sena magħhom.

Paul Saliba:

Bl-età ta’ 67 sena, dan huwa l-aktar resident anzjan tant li f’Dar Nazareth isejħulu ‘l-missier tagħna’. Oriġinarjament Paul huwa minn Raħal Ġdid u ilu f’din id-dar għal madwar 17-il sena. Kull nhar ta’ Sibt filgħaxija huwa joħroġ ma’ ħutu u jmur jiekol il-pizza f’Marsaxlokk.

Lina Mangion:

Lina għandha 62 sena u hija mill-Isla. Hija dejjem iddur u tmur tixtri għand tal-grocer. Lina hija residenti indipendenti f’kollox u tiltaqa’ ma’ ħuha fl-attivitajiet li jorganizzaw ta’ spiss il-Fondazzjoni fosthom BBQs, fi ħruġ varji u f’organizzazzjonijiet ta’ festini.

Marisa Farrugia:

Hija daqt tagħlaq 44 sena u ilha f’Dar Nazareth għal dawn l-aħħar sentejn. Oriġinarjament hija mill-Qrendi u trabbi fenek fid-dar tal-ġenituri tagħha.

Joseph Micallef:

Għandu 47 sena u proprja huwa minn Ħaż-Żebbuġ. Joseph ukoll huwa residenti minn tal-bidunett f’Dar Nazareth. Prattikament, trabba hemm. Huwa indipendenti ħafna u jekk titolbu pjaċir, magħruf li jaqdik mill-ewwel u mill-qalb.

Bis-“Saħħa ta’ Kulħadd” il-ħolma ta’ Dun Anġ tista’ ssir realtà…
U ngħinu 12-il persuna b’diżabilità oħra

Il-maratona ta’ ġbir ta’ fondi “Bis-Saħħa ta’ Kulħadd” se ssir nhar il-Ħadd li ġej biex ngħinu fil-ftuħ tar-raba’ dar għall-persuni b’diżabilità, kif ukoll fi spejjeż marbuta mat-tlett idjar l-oħra diġà eżistenti li fihom jgħixu 30 residenti.
Din il-maratona se tixxandar bejn il-11.00 ta’ filgħodu u tibqa’ sejra sal-11.00 ta’ filgħaxija. Il-poplu Malti, hawnhekk huwa mħeġġeġ jgħin biex il-ħolma ta’ dan is-saċerdot Żejtuni, issir realtà. Ħolma li minnha se jgawdu 12-il persuna b’diżabilità oħra.