Il-kittieb Aleks Farrugia, li kien nominat għall-Premju tal-Unjoni Ewropea għal-Letteratura bir-rumanz tiegħu “Ir-Re Borg”, kellu sensiela ta’ qari barra minn xtutna matul din is-sena.
Aleks Farrugia qara siltiet minn “Ir-Re Borg” fis-Citizens’ Garden tal-Parlament Ewropew fi Brussell. Dan bħala parti mill-programm kulturali organizzat mill-Parlament Ewropew. Għal din l-okkażjoni Farrugia kien ukoll intervistat minn Denise Chircop.
Aleks Farrugia kien ukoll mistieden fiċ-ċentru kulturali tal-belt ta’ Lublin fil-Polonja, fejn qara l-istorja “Toto Jsib lil Malta” mill-ġabra ta’ stejjer “Għall-Glorja tal-Patrija!”, liema ġabra kienet rebħet il-Premju Nazzjonali tal-Ktieb fis-sezzjoni tan-novelli fl-2020. F’din is-serata ta’ letteratura u mużika, intwerew xeni ffilmjati u li juru l-wirt prestoriku Malti li titratta din l-istorja.
Farrugia reġa’ qara siltiet minn “Ir-Re Borg”, tradotti għall-Ingliż minn Martin Bugelli, bħala parti mill-festival ‘Glow-Up’ f’Cologna fil-Ġermanja. Dan il-festival, li jiċċelebra d-demokrazija permezz tal-arti, għażel ir-rumanz ta’ Farrugia għall-mod li bih jittratta l-populiżmu fil-politika kontemporanja.
Aktard dax-xahar Aleks Farrugia se jkun qed jaqra minn “Ir-Re Borg” fl-ambaxxata Maltija fi Brussell.
Il-kotba ta’ Aleks Farrugia: ‘Għall-Glorja tal-Patrija!’ u t-traduzzjoni bl-Ingliż ‘Capricious Tales from Malta’, kif ukoll ‘Camerata!’ u ‘Ir-Re Borg’ ġew ippubblikati minn SKS.
