Il-club ta’ Celtic ikkundanna protesta mmirata lejn l-akbar azzjonist individwali tiegħu, Dermot Desmond, waqt it-tournament tal-golf Alfred Dunhill Links f’St Andrews.
Desmond, ta’ 76 sena, kellu jiġi skortat ’il barra wara li ntefgħu blalen tat-tennis qrib tiegħu fejn anke kważi ġie milqut.
Il-Celtic Fans Collective ħa r-responsabbiltà u talab għal bidla fit-tmexxija tal-club, li akkużahom li “ġabu għajb” fuq isem Celtic.
Il-club qal li l-partitarji għandhom id-dritt jikkritikaw u jipprotestaw b’mod paċifiku, iżda insista li ma jaċċettax atti ta’ intimidazzjoni jew tfixkil.
Il-pulizija Skoċċiża kkonfermat li l-blalen intefgħu fuq il-korsa, iżda ma kien hemm l-ebda rapport ta’ persuni midruba.
Il-grupp tal-partitarji wieġeb billi kkritika lil Desmond u l-prijoritajiet tiegħu.
Din il-protesta saret fil-waqfa internazzjonali wara tliet telfiet konsekuttivi, fosthom tnejn kontra Rangers, u telfa ta’ 3-1 kontra Ferencvaros fl-Europa League.
