L-organizzazzjoni Dinjija tas-Saħħa (WHO) qalet li fil-preżent m’hawn ebda evidenza li turi li persuni li rkupraw mill-Covid-19 għandhom l-immunità biex ma jerġgħux jiġu infettati bil-virus.
Dan fid-dawl ta’ stqarrijiet li dehru jiċċirkolaw u li kienu jgħidu li dawk li jirnexxielhom jegħlbu infezzjoni jistgħu joħolqu bħal sistema ta’ ilqugħ li tattakka l-virus u li tevita li dan jerġgħa jikkawża l-infezzjoni mill-ġdid.
Fir-Renju Unit, l-ittestjar tal-immunità kontra l-virus hija waħda mill-ħames pilastri li l-gvern qed jiffoka fuqhom f’din l-istrateġija tiegħu bil-għan li jegħleb il-virus.
Dan l-ittestjar qed ikun meqjus bħala xi ħaġa kruċjali fir-riċerka u l-iżvilupp tal-vaċċin kif ukoll sabiex tinstab soluzzjoni biex ma jibqax jitwal il-perjodu ta’ lockdown fil-pajjiż.
