L-eks-Prim Ministru Joseph Muscat intalab biex nhar il-Ġimgħa li ġej jitla’ jixhed fl-inkjesta pubblika dwar il-qtil ta’ Daphne Caruana Galizia.
F’każ li jitla’ jixhed, Muscat ikun l-aktar persuna bi profil għoli li jagħti x-xhieda tiegħu fl-inkjesta pubblika li għandha l-għan tistabbilixxi jekk l-istat setx jipprevjeni l-qtil ta’ Caruana Galizia fl-2017.
Muscat kien irriżenja minn Prim Ministru f’Diċembru tas-sena li għaddiet.
L-eks-Chief of Staff tiegħu, Keith Schembri, kien spiċċa fil-mira tal-investigazzjoni dwar il-qtil, liema investigazzjoni wasslet għall-arrest ta’ erba’ persuni fosthom in-negozjanti Yorgen Fenech.
Hekk kif illum kompliet l-inkjesta pubblika, telgħu biex jagħtu x-xhieda tagħhom iċ-ċermen u s-segretarju tal-Kummissjoni Permanenti kontra l-Korruzzjoni. Madankollu huma qalu li l-liġi tipprekludihom milli jixhdu.
