Stħarriġ tal-Assoċjazzjoni Għawdxija għat-Turiżmu juri li l-prestazzjoni turistika matul ix-xhur tas-sajf tal-2026 baqgħet fil-biċċa l-kbira stabbli meta mqabbla mal-2025.
Matul dawn l-aħħar ġimgħat, l-Assoċjazzjoni Għawdxija għat-Turiżmu (Gozo Tourism Association) wettqet stħarriġ online fost stabbilimenti u operaturi fis-settur turistiku sabiex tevalwa l-prestazzjoni tagħhom matul l-istaġun tas-sajf, bejn Ġunju u Settembru 2026, meta mqabbla mal-istess perjodu fl-2025.
L-istħarriġ ġabar it-tweġibiet minn firxa wiesgħa ta’ operaturi fis-settur turistiku, fosthom fornituri ta’ akkomodazzjoni, ristoranti, ċentri tal-għadis, attrazzjonijiet turistiċi, operaturi tat-trasport, aġenziji tal-ivvjaġġar u negozji oħra relatati mat-turiżmu.
Ir-riżultati juru li, b’mod ġenerali, l-istaġun tas-sajf kien wieħed relattivament stabbli, għalkemm kien hemm differenzi fil-prestazzjoni bejn stabbiliment u ieħor. Meta mistoqsija kif kienet il-prestazzjoni kumplessiva tan-negozju tagħhom, 43.08% wieġbu li baqgħet fl-istess livell bħal fl-2025, filwaqt li 35.38% irreġistraw titjib u 21.54% esperjenzaw tnaqqis.
Is-suq barrani jkompli jkollu rwol importanti
Is-suq barrani kompla jkun sors importanti ta’ kontribut għall-prestazzjoni tan-negozji turistiċi f’Għawdex. Fil-fatt, 64.62% ta’ dawk li wieġbu qalu li t-turisti barranin kellhom impatt pożittiv fuq in-negozju tagħhom, filwaqt li 18.46% ma rreġistraw ebda impatt u 16.92% indikaw impatt negattiv.
Meta l-prestazzjoni tas-suq barrani tqabblet mal-istess perjodu tal-2025, 43.08% qalu li baqgħet fl-istess livell, 38.46% irrappurtaw titjib, filwaqt li 18.46% esperjenzaw tnaqqis.
Fir-rigward tas-suq domestiku, jiġifieri l-viżitaturi Maltin, 48.44% ta’ dawk li wieġbu qalu li ma kellhomx impatt sinifikanti fuq in-negozju tagħhom. Min-naħa l-oħra, 31.25% esperjenzaw effett pożittiv, filwaqt li 20.31% irrappurtaw impatt negattiv.
Meta mqabbel mal-2025, il-maġġoranza, jiġifieri 57.81%, qalu li l-prestazzjoni tas-suq domestiku baqgħet l-istess. Sadanittant, 25% irreġistraw tnaqqis u 17.19% innutaw titjib.
Id-dħul jibqa’ sodisfaċenti, iżda mhux għal kulħadd
Dwar id-dħul iġġenerat matul l-istaġun tas-sajf, 47.69% tal-parteċipanti kklassifikawh bħala medju, 40% bħala tajjeb u 12.31% bħala batut.
Meta tqabbel direttament id-dħul mal-istess perjodu tal-2025, 38.46% qalu li baqa’ fl-istess livell, 36.92% irreġistraw żieda, filwaqt li 24.62% esperjenzaw tnaqqis.
Dawk l-operaturi li rrappurtaw titjib fid-dħul ġew mistoqsija wkoll dwar il-fatturi li kkontribwew għal dan ir-riżultat. Fost dawk li wieġbu għal din il-mistoqsija, 65.63% indikaw żieda fil-prezzijiet, filwaqt li 56.25% semmew żieda fil-klijentela. Barra minn hekk, 34.38% attribwew it-titjib għal strateġiji ta’ kummerċjalizzazzjoni aħjar, filwaqt li 12.50% semmew l-introduzzjoni ta’ servizzi jew offerti ġodda.
Min-naħa l-oħra, fost dawk li rrappurtaw tnaqqis fid-dħul, 77.27% indikaw li l-klijenti kienu qed jonfqu inqas għal kull żjara jew tranżazzjoni. Żieda fil-kompetizzjoni ssemmiet minn 45.45%, filwaqt li 40.91% indikaw tnaqqis fin-numru ta’ klijenti.
X’hemm bżonn biex jitjieb il-prodott turistiku Għawdxi?
Fl-aħħar parti tal-istħarriġ, il-parteċipanti ġew mistiedna jissuġġerixxu miżuri li jistgħu jgħinu biex jitjieb il-prodott turistiku ta’ Għawdex, tiżdied il-kwalità tal-viżitaturi u l-infiq tagħhom, kif ukoll jinħolqu aktar opportunitajiet kummerċjali għall-operaturi.
Fost is-suġġerimenti li ħarġu kien hemm il-ħtieġa ta’ promozzjoni aktar b’saħħitha ta’ Għawdex bħala destinazzjoni għal żjarat itwal, titjib fil-konnettività bejn iż-żewġ gżejjer, infrastruttura aħjar u trasport pubbliku aktar effiċjenti.
L-operaturi enfasizzaw ukoll l-importanza ta’ aktar indafa, ġestjoni aħjar tat-traffiku u protezzjoni tal-karattru uniku tal-gżira u tal-ambjent naturali tagħha. S
Meħuda flimkien, ir-riżultati ta’ dan l-istħarriġ juru li, minkejja li l-istaġun tas-sajf tal-2026 kien wieħed relattivament stabbli għall-maġġoranza tal-operaturi turistiċi, għad hemm diversi sfidi li jeħtieġu attenzjoni u azzjoni konkreta.
Huwa importanti li l-attività turistika f’Għawdex ma titkejjilx biss f’termini ta’ numru ta’ viżitaturi, iżda wkoll mill-benefiċċji ekonomiċi reali li tasal biex tiġġenera għall-istabbilimenti u n-negozji lokali.
Għaldaqstant, l-iżvilupp sostenibbli tat-turiżmu f’Għawdex għandu jimxi id f’id ma’ titjib fl-infrastruttura, servizzi aktar effiċjenti, protezzjoni tal-ambjent u esperjenza aħjar kemm għall-viżitaturi kif ukoll għan-negozji li jiddependu minn dan is-settur importanti għall-ekonomija tal-gżira.