Il-Bord tal-Gvernaturi tal-Awtorità għas-Servizzi Finanzjarji ta’ Malta (MFSA) ħatar lil Joseph Gavin bħala l-Uffiċjal Kap Eżekuttiv il-ġdid tal-Awtorità. Huwa se jinħatar b’mod uffiċjali f’Settembru li ġej.
Fi stqarrija, l-MFSA qalet li bħala Uffiċjal Kap Eżekuttiv, huwa se jkun responsabbli biex imexxi il-Kumitat Eżekuttiv tal-Awtorità u se jkun membru wkoll fil-Bord tal-Gvernaturi tal-Awtorità.
Joseph Gavin, intgħażel wara sejħa għall-applikazzjonijiet li kienet miftuħa għal kulħadd.
Fir-rwol il-ġdid tiegħu bħala Kap Eżekuttiv tal-MFSA, is-Sur Gavin se jkun responsabbli għall-immaniġġjar ġenerali u l-prestazzjoni tal-Awtorità, kif ukoll se jieħu ħsieb l-implimentazzjoni ta’ riformi u konsolidazzjoni fis-settur tas-servizzi finanzjarji.
Is-Sur Gavin serva fil-Bank Ċentrali tal-Irlanda bejn l-2009 u l-2015, fi żmien li fih ir-regolatur Irlandiż kien għaddej minn tibdil sinifikanti.
L-MFSA rringrazzjat lil Christopher P. Buttigieg li serva bħala Kap Eżekuttiv ad interim minn Ottubru li għadda u li kien strumentali għall-Awtorità matul dan il-perjodu ta’ sfida.
