Fir-reazzjoni tiegħu għall-pubblikazzjoni tas-Servizz Pubbliku ‘Governance Action on the Parliamentary Ombudsman’s Annual Report 2020’, permezz ta’ ittra mibgħuta lill-Ispeaker tal-Parlament u mpoġġija fuq il-mejda tal-kamra it-Tnejn, l-Uffiċċju tal-Ombudsman ma tax kas aspetti pożittivi, fosthom li 98% tal-każijiet magħluqa minnu juru li s-Servizz Pubbliku jkun aġixxa tajjeb.
L-istqarrija nnutat li l-proposti mressqa mis-Servizz Pubbliku għandhom l-għan li l-entitajiet kollha ta’ skrutinju fuq l-amministrazzjoni pubblika, mhux l-Ombudsman biss, ikollhom proċeduri ċari u trasparenti dwar ingaġġ ta’ konsulenti u persons of trust fi ħdanhom.
L-Uffiċċju tas-Segretarju Permanenti Ewleini saħaq li mill-istess risposta tal-Uffiċċju tal-Ombudsman jirriżulta li għal darb’oħra, dan mhux jagħti kas dawn il-proposti tas-Servizz Pubbliku biex jiddaħħlu fl-emendi għal-liġi li tirregolah.
L-Amministrazzjoni Pubblika qed tipproponi wkoll li r-rakkomandazzjonijiet tal-Ombudsman ikunu jibbażaw fuq il-fatti. L-Amministrazzjoni Pubblika għandha direzzjoni ċara li kwalunkwe rakkomandazzjoni mill-entitajiet ta’ skrutinju bħall-Uffiċċju tal-Ombudsman jiġu aċċettati u implimentati sakemm tali rakkomandazzjonijiet ma jmorrux kontra l-liġi.
Il-pubblikazzjonijiet ‘Governance Action’ huma bbażati fuq il-fatti dokumentati, u s-Servizz Pubbliku lest jippreżenta l-informazzjoni dokumentata kollha lill-Ispeaker.