L-attakkant ta’ Paris Saint-Germain, Lionel Messi, m’għandu l-ebda pjan li jħalli lil-leaders tal-Ligue 1 fit-tieqa tat-trasferimenti tas-sajf.
Is-seba’ darbiet rebbieħ tal-Ballun tad-Deheb tħabat biex isib l-aqwa forma ta’ goals minn meta għamel iċ-ċaqliq lejn Pariġi minn ma’ Barcelona, u rreġistra biss żewġ goals f’16-il dehra fil-Ligue 1.
Messi jinsab taħt kuntratt fil-Parc des Princes sal-2023 bl-għażla ta’ sena oħra, iżda kien hemm suġġerimenti li l-Arġentin jista’ jfittex tluq bikri.
Inter Miami affermaw li se “jagħmlu minn kollox” biex jippruvaw jiffirmaw lil Messi qabel jirtira, iżda l-player ta’ 34 sena beħsiebu jibqa’ ma’ PSG tal-inqas sal-2023.
Messi kien irrabjat bit-trattament tiegħu mill-media Franċiża, iżda l-ex Blaugrana jidher li m’għandu l-ebda intenzjoni li jfittex li jħalli l-club dan is-sajf.
Messi skorja total ta’ seba’ goals u rreġistra 11-il assist minn 23 dehra għal PSG matul l-istaġun tad-debutt tiegħu u pprovda żewġ assists lil Kylian Mbappe fir-rebħa ta’ 3-1 fi tmiem il-ġimgħa fuq Saint-Etienne.
