Il-club Sawdi, Al-Ittihad, qed isaħħaħ l-insegwiment tiegħu biex jiksbu l-firma tal-attakkant internazzjonali Eġizzjan ta’ Liverpool, Mohamed Salah (ritratt).
Wara li r-Reds irrifjutaw l-offerta ta’ £150 miljun, id-diriġenti Għarab iltaqgħu b’urġenza u għollew l-istess offerta għal £200 miljun għal dan il-player ta’ 31 sena.
Issa, filwaqt li s-suq tat-trasferimenti fl-Ewropa għalaq nhar il-Ġimgħa, dak fil-Lvant Nofsani jintemm nhar il-Ħamis, li ġej, 7 ta’ Settembru. Għaldaqstant filwaqt li l-clubs Ewropej ma jistgħux jiffirmaw players, huma jistgħu jċeduhom. U proprju Liverpool inqabdu f’din id-dilemma.
Dan minħabba li l-offerta waslet tard u l-club Ingliż sabha diffiċli biex isib is-sostitut tiegħu f’qasir żmien. Peró wieħed ma jridx jinsa li f’dawn il-ħamest ijiem Al-Ittihad se jagħmlu dak kollu fil-poter tagħhom biex jingaġġaw lil Salah.
Min-naħa l-oħra, jekk il-player Eġizzjan ma jitlaqx issa, jista’ jħalli lill-club f’Jannar li ġej. U allura Liverpool se jitilfu din is-somma stratosferika? Nistennew u naraw.
Fil-veritá, Liverpool huma konxji ta’ din is-sitwazzjoni u minkejja li qed itennu li ma jridux iċedu lil din il-ġawhra, huma qed jidentifikaw is-sostitut tiegħu … għax wara kollox erba’ xhur oħra jgħaddu.
L-aktar żewġ players fil-mira tagħhom bħala sostituti potenzjali huma, Karim Adeyemi ta’ Borussia Dortmund u Leroy Sane ta’ Bayern Munich.
Filwaqt li Sane, 27 sena, għandu l-esperjenza tal-Prmier League minħabba li kien jilgħab ma’ Manchester City, Adeyami għandu biss 21 sena iżda diġà impressjona fil-Bundesliga.
Barra minn hekk, Liverpool għandhom lil Ben Doak, 16-il sena, li huwa meqjus li se jimxi fuq il-passi ta’ Salah u diġá għamel id-debutt tiegħu mal-Merseysiders.
