Liverpool huwa l-aħħar club li ngħaqad fit-tellieqa għall-attakkant ta’ Borussia Dortmund, Erling Braut Haaland.
Iż-żagħżugħ ta’ 21 sena mistenni jħalli l-club meta s-sajf li ġej tiġi attivata l-klawsola tiegħu ta’ release ta’ £68 miljun, b’Barcelona, Real Madrid, Paris Saint-Germain, Manchester City u Manchester United kollha jisnabu interessati fih.
Il-Kap Eżekuttiv ta’ Dortmund, Hans-Joachim Watzke, ammetta li se tkun diffiċli għal BVB li jżommu s-servizzi ta’ Haaland is-sena d-dieħla, b’għadd kbir ta’ clubs stabbiliti se jkunu qed jiġġieldu għas-servizzi tiegħu.
Liverpool issa jinsabu fit-taqtiegħa għall-firma ta’ Haaland fost inċertezza dwar il-futur ta’ Mohamed Salah, bl-Eġizzjan għadu jrid jestendi l-esperjenza tiegħu f’Anfield lil hinn mill-2023.
Il-club immexxi minn Jurgen Klopp jista’ għalhekk ikun qed jippjana offerta doppja għaż-żewġ players ta’ Dortmund, Haaland u Jude Bellingham, b’Liverpool huma “interessati ħafna” li jiffirmaw lill-internazzjonali Ingliż.
Haaland diġà skorja 11-il goal u pprovda erba’ assists minn tmien logħbiet fl-istaġun 2021-22 fil-kompetizzjonijiet kollha, bit-total ta’ goals tiegħu għal Dortmund issa tela’ għal 68 goal minn 67 logħba minn meta ngħaqad magħhom mingħand Red Bull Salzburg.
