Il-midfielder offensiv internazzjonali Malti, Luke Gambin, se jerġa’ jilgħab fl-Ingilterra wara li ngħaqad ma’ Sutton United FC.
Gambin imwieled Londra, li għandu 29 sena, kien beda l-karriera tiegħu ma’ AFC Wimbledon u mbagħad ingħaqad ma’ Barnet minn fejn kellu perjodi b’self ma’ Metropolitan Police u Hendon Town. Huwa ngħaqad ma’ Luton Town f’Jannar 2017, fejn qatta’ l-istaġun 2018/19 b’self ma’ Crawley Town. Fis-sajf tal-2019, Gambin ingħaqad ma’ Colchester United iżda ngħaqad ma’ Newport County b’self f’Jannar 2021.
Is-sajf li għadda, Gambin ingħaqad ma’ Hamrun Spartans wara li qablu dwar ftehim fit-tul iżda ż-żewġ partijiet qablu flimkien li jtemmu l-kuntratt fi tmiem l-istaġun.
Sutton United jilagħbu fil-League Two. Huma spiċċaw fit-tmien post matul l-istaġun li għadda, fejn tilfu li jagħmluha għall-fażi tal-play-offs għall-punt wieħed biss.
