Il-Fondazzjoni Women for Women diġà laħqet €2,000 f’bejgħ ta’ kalendarju speċjali
Meta omm tkun qiegħda tgħix fi tbatija, maħqura jew bla flus, it-tfal ibatu magħha. Il-problemi soċjali huma mifruxa u wieħed mill-aktar li jiddispjaċina nisimgħu dwaru huwa dak fejn hemm minuri f’sitwazzjonijiet iebsa minħabba abbuż.
F’Malta niddiskutu ħafna dwar il-vjolenza domestika u l-abbuż b’mod inġenerali fuq n-nisa u tajjeb li wieħed isemmi li bħalissa l-Fondazzjoni Women for Women għaddejja ‘kampanja ta’ ġbir ta’ fondi permezz ta’ bejgħ ta’ kalendarju speċjali bil-għan li tingħata għajnuna tant meħtieġa lil nisa u tfal vulnerabbli. Il-ġbir ta’ fondi minn dan il-kalendarju diġà laħaq madwar €2,000 u dan żgur li se jgħin lill-Fondazzjoni tkompli bil-ħidma tagħha li ta’ kull ġimgħa tgħin medja ta’ 10 ommijiet f’ċirkostanzi iebsa b’xirjiet tal-ikel, donazzjonijiet ta’ ħwejjeġ, għamara u apparat domestiku fost l-oħrajn.
“It-12-il mara magħżula spiraw lil din il-Fondazzjoni għar-reżiljenza, għad-determinazzjoni u għall-mod pożittiv li bih iħarsu lejn il-ħajja,” Fondazzjoni Women for Women
“Għal ħafna żmien għext f’dinja oħra u qatt ma mmaġinajt li hemm tant tbatija madwari u dan b’mod speċjali fost nisa u tfal. F’dawn l-aħħar snin sirt naf bi stejjer tal-biżgħa dwar abbuż fuq it-tfal, faqar u problemi ta’ saħħa fost l-oħrajn. Fl-istess ħin, però, iltaqjt ma’ nisa ta’ reżiljenza liema bħalha li minkejja kollox, bi ftit għajnuna u gwida mingħandna u mingħand il-ħaddiema soċjali, ħarġu mill-abbuż tas-sieħeb jew tal-ġenituri tagħhom”. Dan huwa l-messaġġ ta’ għarfien li qiegħda twassal Francesca Fenech Conti, fundatriċi u rappreżentanta tal-Fondazzjoni Women for Women, li qiegħda tħeġġeġ lill-pubbliku Malti jixtri l-ewwel edizzjoni tal-kalendarju “Extraordinary Women for 2022”.
F’kummment li tat lil dan il-ġurnal Fenech Conti qaltina li bħala Fondazzjoni jgħinu lil dawk kollha li jridu jgħinu lilhom infushom biex ikollhom futur aħjar u stabbli. Hija qalet li jidħlulhom ħafna każijiet b’mod partikolari dawk ta’ vjolenza domestika fuq ommijiet bi tfal żgħar li minkejja li jkunu jridu jaħdmu, dawn ma jistgħux.
“Meta jkollhom iktar minn wild wieħed u dawn ikunu ta’ etajiet żgħar, huwa diffiċli mmens li taħdem jekk ma jkollokx ma’ min tħalli t-tfal u dan anke jekk hemm iċ-childcare. F’dawn iż-żminijiet jagħlqu u jekk ma ssibx min jimpjegak bil-flessibbiltà ma tkunx tista’ taħdem. Dan aktar u aktar f’każijiet fejn hemm tfal b’xi diżabbiltà,” spjegat il-fundatriċi ta’ Women for Women.
Hija qalet li fost il-każijiet li wkoll jaraw hemm dawk ta’ nisa li jiġu daharhom mal-ħajt minħabba li jiġrilhom xi avveniment mhux mistenni fosthom meta jimrad ir-raġel u hija ma tkunx taħdem.
L-ewwel edizzjoni tal-kalendarju
Il-kalendarju “Extraodinary Women for 2002” jirrikonoxxi, jispira u fl-istess ħin jagħti ħajr il-kuraġġ ta’ 12-il mara “normali” li qegħdin jagħmlu affarijiet straordinarji biex jagħmlu lill-pajjiżna wieħed aħjar.
In-nisa fir-ritratti għaddew personalment minn esperjenzi u l-azzjonijiet tagħhom għamlu impatt pożittiv fuq ħajjet ħaddieħor. Il-kalendarju fih 12-il ritratt ta’ 12-il mara f’etajiet u razez varji, li ġejjin minn ambjenti differenti u li kollha għandhom storja partikolari x’jirrakkontaw. Fost dawn hemm ir-rebbieħa tal-medalja tar-Repubblika, Ethel Vento Zahra u Caroline Galea li għenet lill-immigrant li kien imweġġa’ mitluq mal-art fil-Mellieħa – Lamin Jaiteh.
Il-Fondazzjoni Women for Women qalet li l-għażla tal-personalitajiet nisa għal dan il-kalendarju ma kinitx waħda faċli u li l-għan tiegħu huwa li jwassal il-ħidma ta’ dawn in-nisa li b’imħabba dejjem jgħinu lill-proxxmu. It-12-il mara magħżula spiraw lil din il-Fondazzjoni għar-reżiljenza, għad-determinazzjoni u għall-mod pożittiv li bih iħarsu lejn il-ħajja.
Francesca Fenech Conti, hija stess omm ta’ erbat itfal, qalet li dawn in-nisa li jidhru f’din l-edizzjoni speċjali wrewha kemm verament bħala poplu nistgħu ngħinu lil xulxin biex flimkien niżguraw li l-ulied ta’ nisa abbużati ma jkunux vittmi huma wkoll. Din ir-rappreżentanta tal-Fondazzjoni sostniet li, “aħna ngħinu lil dawn l-ommijiet imma fil-verità, qegħdin nagħmlu dan għat-tfal għax dawn huma l-futur”.
Il-Fondazzjoni Women for Women tgħin lill-ommijiet biex il-minuri jibqgħu jgħixu ma’ ommhom. Għaldaqstant, permezz ta’ din il-kampanja qiegħed isir appell għall-għajnuna li tista’ ssir f’forom differenti ta’ donazzjonijiet. Wieħed jista’ jgħin bix-xiri ta’ dan il-kalendarju; jew permezz ta’ donazzjoni żgħira ta’ kull xahar; sħubija mal-Fondazzjoni, jew inkella, għal min jippreferi, jista’ jagħmel donazzjoni ta’ darba.
Il-fotografu ta’ dan il-kalendarju hija Therese Debono.
It-12-il mara magħżulha: Alessia Bonnici; Angele Cuschieri; Caroline Galea; Ethel Vento Zahra; Karly May; Lorinda Mamo; Melissa Pace; Pamela Muscat; Patricia Graham; Serkadis Lemi; Shakira Fenech; u Solange Magri
Kull min jixtieq jgħin jista’ jagħmel dan permezz ta’: Revolut jew BOV fuq: 999 111 00; SMS: 50617922 (donazzjoni ta’ €4.66); 50619267 (donazzjoni ta’ €11.65)
Ta’ kull ġimgħa l-Fondazzjoni Women for Women tgħin medja ta’ 10 ommijiet f’ċirkostanzi iebsa b’xirjiet tal-ikel, donazzjonijiet ta’ ħwejjeġ, għamara u apparat domestiku fost l-oħrajn…
