“Ma ksirt ebda kodiċi ta’ etika”. Hekk iddikjara l-eks Kummissarju Ewropew, John Dalli meta ħareġ mill-Qorti.
John Dalli llum kien il-Qorti fejn l-Avukat Antoine Agius Bonnici, mill-uffiċċju tal-Avukat Ġenerali qal li għad ma hemmx ċertezza jekk Dalli jistax ikun mixli.
Hu semma li hemm trattat tal-Unjoni Ewropea li jingħad li ċertu uffiċjali, fosthom Kummissarji Ewropej, jistgħu jkollhom l-immunità fuq prosekuzzjoni.
L-akkużi ta’ Dalli huma marbuta ma’ allegata talba minn eks kollaboratur tiegħu biex tinbidel liġi Ewropea dwar l-isnus, forma ta’ tabakk li ma jitpejjipx.
Id-Difiża ta’ Dalli akkużat lill-Prosekuzzjoni li qed iġebbdu l-affarijiet u dan minħabba li m’għandhomx każ b’saħħtu biżżejjed kontrih.
