Għaxaq Wolves baqgħu b’punti massimi minn tliet logħbiet u jinsabu waħedhom fl-ewwel post tal-klassifika tal-kampjonat tal-Ewwel Diviżjoni tal-MAFA wara li għelbu lil San Ġiljan Saints 2-1.
Kienet logħba ferm akkanita b’San Ġiljan li bdew tajjeb tant li marru minn fuq iżda b’Għaxaq li għarfu jdawru l-iskor favurihom u eventwalment jieħdu t-tliet punti finali.
Kien Sam Whelan li wara biss erba’ minuti logħob poġġa lil San Ġiljan Saints minn fuq għalkemm l-Għaxqin wettqu reazzjoni immedjata u tliet minuti wara ġabu l-iskor indaqs permezz ta’ Diego Fernando Galvis Ovallos.
Il-Wolves skorjaw dak li kellu jkun il-gowl tar-rebħa permezz ta’ Diego Fernando Pereira.
Referee kien Peter Abela.
Balluta Barracudas kisbu t-tieni rebħa konsekuttiva wara li għelbu lil Ta’ Ġiorni Wanderers 4-0. Wara li fl-ewwel taqsima ma ġie skorjat l-ebda gowl, il-Cudas ħarġu ferm aggressivi u skorjaw erba’ gowls mingħajr risposta.
Timmy Zammit Lupi poġġa lil Balluta minn fuq fl-40 minuta sabiex Paco Vassallo skorja t-tieni gowl sitt minuti wara. Fit-53 minuta, Andrew Tortell għamilhom tlieta sabiex fil-ħin mogħti żejjed mir-referee, Ruslan Borg għaqqad il-poker għar-rebbieħa.
Referee kien Alex Grech.
Fit-tieni diviżjoni, Ħamrun Amateurs kisbu l-ewwel tagħhom staġjonali wara li għelbu lil Ħal Far Titans 1-0.
Il-gowl li ddeċieda l-logħba ġie skorjat seba’ minuti minn tmiem il-konfront permezz ta’ Andriy Camilleri.
Għal Ħal Far Titans din hi t-tielet telfa minn daqstant logħbiet u għadhom qed ifittxu l-ewwel punti tal-istaġun.
Referee kien Jonathan Balzan.
Attard Edex Kings kisbu l-ewwel rebħa tagħhom wara żewġ telfiet konsekuttivi hekk kif għelbu lil Gudja Wanderers 2-1.
Il-Gudjani kellhom bidu mill-aqwa u marru minn fuq wara erba’ minuti logħob permezz ta’ Timothy Portelli.
Żewġ minuti minn tmiem l-ewwel taqsima, Attard ġabu l-iskor indaqs permezz ta’ Luca Camilleri sabiex fit-53 minuta, Miguel Acevedo skorja l-gowl li ta t-tliet punti lit-tim tiegħu.
Referee kien Karl Stefan Galea.
Fit-tielet diviżjoni, Mosta Vikings kisbu l-ewwel rebħa tagħhom staġjonali wara li għelbu lil St Paul’s Bay NMFC 3-1.
L-ewwel taqsima kienet waħda pjaċevoli fejn il-Vikings ħadu l-kontroll tal-logħba u skorjaw tliet gowls permezz ta’ Karl Kurt Muscat, Darren Bartoli u Nigel Schembri Zammit.
Fit-tieni taqsima, St Paul’s Bay NMFC bdew jagħfsu għall-gowl u rnexxielhom inaqqsu l-iskor fil-65 minuta permezz ta’ Sonam Gurung.
Referee kien Lorry Sammut.
