Iċ-champions Senglea Gunners irritornaw għar-rebħ fil-kampjonat tal-Ewwel Diviżjoni tal-MAFA wara li għelbu lil Valletta Stars St Dominic bl-iskor ta’ 1-0.
It-tim mill-Kottonera kien għadu ġej minn żewġ telfiet konsekuttivi kontra Valletta St Paul’s l-ewwel fil-Joe Compagno Cup imbagħad fil-kampjonat u għalhekk riedu jikkonfermaw li se jkunu fost il-kontendenti għar-rebħ tat-titlu.
Minkejja kollox, huma sabu lil Valletta Stars ferm motivati b’dawn tal-aħħar li kienu sfortunati li ma ħarġux b’punt minn din il-partita.
L-uniku gowl tal-logħba ġie skorjat fid-69 minuta minn Ousman Touray wara li rċieva tajjeb minn freekick, bid-difiża Beltija maqbuda fuq sieq waħda.
Referee kien Sillah Al Hasana
It-tim promoss ta’ Swieqi Braves kiseb rebħa komda ta’ 2-0 kontra San Ġwann Pro Evolution Academy sabiex irreġistra l-ewwel rebħa fl-ogħla diviżjoni.
Min-naħa tagħhom, San Ġwann kienu qed isofru t-tieni telfa konsekuttiva wara dik kontra Marsa St Michael fl-ewwel ġurnata.
Swieqi marru minn fuq fis-17-il minuta permezz ta’ Lucas dos Santos sabiex Bruno Menezes irdoppja l-iskor tliet minuti mit-tmiem il-konfront.
Referee kien Lorry Sammut.
Gudja Wanderers huma l-leaders assoluti tal-kampjonat tat-tieni diviżjoni minkejja draw ta’ 1-1 kontra Mqabba Albions.
Kienet logħba movimentata b’Gudja li bdew tajjeb iżda bi Mqabba li baqgħu jagħfsu sabiex ma joħorġux b’idejhom vojta minn din il-partita.
Damian Callus poġġa lill-Gudjani minn fuq wara tliet minuti logħob b’Dino Colic li ġab l-iskor indaqs żewġ minuti minn tmiem il-partita.
Referee kien Alex Grech.
It-tim promoss ta’ Attard Edex Kings għeleb lil Żebbuġ Youngsters 1-0.
Il-gowl uniku li ddeċieda l-konfront ġie skorjat lejn l-aħħar tal-konfront minn Kiran Das Valikkatu.
Żebbuġ Youngsters ippruvaw iwettqu reazzjoni sabiex iġibu l-iskor indaqs iżda Attard żammew sod fid-difiża sabiex ħadu tliet punti li jiswew mitqlu deheb.
Referee kien Reno Galea.
Ħamrun Amateurs kisbu rebħa tennistika ta’ 6-1 kontra Kalkara Flames fl-unika logħba li kellna mit-tielet diviżjoni.
Kif jindika l-iskor, il-Ħamruniżi ddominaw din il-logħba mill-bidu sal-aħħar fejn stabilixxew vantaġġ ta’ tliet gowls sal-ewwel nofs siegħa logħob.
Fit-tieni taqsima, il-pjan tal-logħba qajla nbidel bl-Amateurs li kkontrollaw il-logħba u b’Kalkara li għallinqas irnexxielhom inaqqsu l-marġni tal-iskor.
Josef Zammit skorja doppjetta għall-Ħamrun filwaqt li Alex Gomes Verala, Andriy Camilleri, Mauro Busuttil u Grigorios Lampropoulos żiedu aktar gowls għat-tim tagħhom.
Shylon Mangion naqqas il-marġni tal-iskor għal Kalkara Flames.
Referee kien CJ Saliba.
KLASSIFIKA – MAFA L-EWWEL DIVIŻJONI
Swieqi Braves 4, San Ġiljan Saints, Marsa St Michael’s, Valletta St Paul’s, Senglea Gunners 3, Valletta Stars 1, Balluta Barracudas, San Ġwann Pro Evolution Academy 0.
KLASSIFIKA – MAFA IT-TIENI DIVIŻJONI
Gudja Wanderers 4, Għaxaq Wolves, Ta’ Ġiorni Wanderers, Attard Edex Kings 3, Mqabba Albions 2, Birkirkara St Joseph 1, Żebbuġ Youngsters, Buġibba Club de SWAT 0.
KLASSIFIKA – MAFA IT-TIELET DIVIŻJONI
Ħamrun Amateurs, Ħal Far Titans, Naxxar Victorians 3, Mosta Vikings, Kalkara Flames 0.
