Mqabba Albions wettqu waħda mill-ikbar sorpriżi tal-istaġun meta b’gowl uniku lejn l-aħħar ta’ Miguel Grima għelbu lil-liders Żebbuġ Youngsters sabiex tawhom l-ewwel telfa tal-istaġun.
Mill-banda l-oħra, it-timijiet li qed isegwu l-istess Żebbuġ fil-kampjonat tat-tieni diviżjoni iġifieri Balluta Barracudas u San Ġwann Pro Evolution Academy ukoll kisbu t-tliet punti mil-logħbiet rispettivi tagħhom sabiex it-taqtiegħa għall-promozzjoni issa tidher aktar akkanita.
Mqabba Albions kisbu s-seba’ rebħa staġjonali bi stil meta kontra kull mistenni għelbu lil Żebbuġ Youngsters 1-0. B’hekk dawn tal-aħħar mhux biss ġarrbu l-ewwel telfa tal-istaġun iżda anke waqqgħu l-ewwel punti tagħhom wara disa’ logħbiet konsekuttivi ta’ rebħ.
It-tim immexxi minn Kevin Bugeja kien determinat u beda jhedded kontinwament il-lasti difiżi minn Victorio Ciantar. Min-naħa tagħhom Żebbuġ ippruvaw iżommu l-pussess u jtellgħu xi blalen perikolużi iżda ftit setgħu jkunu effettivi fuq quddiem.
Mqabba skorjaw il-gowl li tahom it-tliet punti mat-tokki tat-63 minuta meta wara through pass tajjeb, difensur ta’ Żebbuġ ikklerja ħażin bil-ballun jasal għand Miguel Grima li b’xutt fil-baxx ma ħafirx.
Referi kien Gordon Barbara.
San Ġwann Pro Evolution Academy ftit sabu diffikulta’ sabiex jegħlbu lit-tim tal-qiegħ Żejtun Laċċi 3-0.
B’ din ir-rebħa, l-Istudenti Franċiżi issa jinsabu biss tliet punti bogħod mil-liders Żebbuġ Youngsters. Huma għamlu l-affarijiet ċari sa mill-bidu u marru minn fuq wara biss żewġ minuti permezz ta’ Wissam Bensaidi.
Fit-tieni taqsima, San Ġwann baqgħu persistenti u skorjaw żewġ gowls oħra grazzi għal Louis Swann Vachet fit-58 minuta u Jeremy Ramin fis-67 minuta.
Referi kien Joe Camilleri.
Andrew Tortell kien l-eroj ta’ Balluta Barracudas hekk kif skorja hat-trick fil-logħba kontra Naxxar Victorians. Il-Cudas rebħu din il-partita 3-1 sabiex b’hekk jinsabu biss sitt punti bogħod mill-quċċata għalkemm baqgħu fir-raba’ post.
Ironikament kienu Naxxar li marru minn fuq fil-21 minuta permezz ta’ Daniel Camilleri. Minkejja kollox Balluta Barracudas baqgħu kalmi u ġabu l-iskor indaqs fid-29 minuta permezz ta’ Andrew Tortell.
Hekk kif l-ewwel taqsima għalqet 1-1, fit-tieni taqsima Andrew Tortell kompla bil-wirja kbira tiegħu hekk kif żied żewġ gowls oħra fit-52 u fid-59 minuta minn penalty.
Referi kien Jason Penza.
F’partita bejn żewġ timijiet li jinsabu fin-naħa t’isfel tal-klassifika, Fgura Spartans u Mosta Vikings temmew il-konfront ta’ bejniethom fi dro ta’ 1-1. Dan l-iskor ftit biddel il-pożizzjoni tagħhom fil-klassifika.
Kienu Mosta li marru minn fuq fil-15-il minuta permezz ta’ Calvin Agius sabiex sitt minuti wara l-Fgurin iġibu l-iskor indaqs permezz ta’ Ismael Buttigieg.
Referi kien Jonathan Balzan.
Mill-kampjonat tat-tielet diviżjoni, Żabbar Southsiders ingħataw walk-over u eventwalment rebħa ta’ 2-0 kontra Floriana Fsobians. Fl-istess waqt il-Furjaniżi tnaqqsulhom tliet punti mill-klassifika tagħhom b’Żabbar li issa jinsabu fl-ewwel post b’19-il punt.
KLASSIFIKA – MAFA IT-TIENI DIVIŻJONI
Żebbuġ Youngsters 27, San Ġwann Pro Evolution Academy 24, Mqabba Albions 22, Balluta Barracudas 21, Naxxar Victorians 9, Fgura Spartans, Mosta Vikings 6, Żejtun Laċċi 1
KLASSIFIKA – MAFA IT-TIELET DIVIŻJONI
Żabbar Southsiders 19, Swieqi Braves 18, Floriana Fsobians 16, , Ta’ Ġiorni Wanderers 16, Birkirkara St Joseph 5, Gudja WanderĦal Far Sparks, Gudja Wanderers 4
