San Ġwann Pro Evolution Academy rebħu l-konfront dirett kontra Żebbuġ Youngsters 2-1 sabiex laħqu lill-istess avversarji fl-ewwel post tal-klassifika.
Minkejja kollox, iż-żewġ timijiet ġew promossi għall-kampjonat tal-Ewwel Diviżjoni wara r-riżultat ta’ 2-2 fil-konfront ieħor dirett bejn Balluta Barracudas u Mqabba Albions.
Fin-naħa t’isfel, minkejja li Żejtun Laċċi kisbu l-ewwel rebħa tal-kampjonat, huma xorta ġew relegati minħabba li Mosta Vikings rebħu 3-1 lil Naxxar Victorians.
San Ġwann Pro Evolution Academy dawwru telfa f’rebħa sabiex għelbu lil Żebbuġ Youngsters 2-1. Kienet logħba ferm mistennija bejn żewġ timijiet protagonisti fit-tieni diviżjoni li urew il-potenzjal tagħhom tul l-istaġun kollu.
Fit-28 minuta kienu l-Youngsters li marru minn fuq meta kien Leandro Rodriguez li skorja direttament minn frikik.
L-istudenti Franċiżi mal-ewwel wettqu reazzjoni u ġabu l-iskor indaqs meta kien Alexandre Courroux li minn ġol-kaxxa fajjar xutt b’saħħtu li Ciantar laqa’ iżda ma żammx bil-ballun jaqbeż il-linja għal ġewwa.
Bl-ewwel taqsima tagħlaq 1-1.
Fit-tieni taqsima, San Ġwann Pro Evolution Academy bdew jersqu aktar lejn il-lasti Żebbuġin bid-difiża avversarja li bdiet issibha ferm diffiċli f’xi mumenti.
Fit-38 minuta, San Ġwann laqtu l-lasta wara daqqa ta’ ras ta’ Bensaidi filwaqt li 11-il minuta wara xutt ta’ Liam Grandehomme sab lill-gowlkiper Żebbuġi jilqa’ tajjeb għall-korner.
Fis-57 minuta, San Ġwann Pro Evolution Academy ingħataw penalty meta Abdul Fadeel twaqqa’ fil-kaxxa minn difensur Żebbuġi sabiex mill-11-il metru kien Swann Vachet li xeħet il-gowlkiper naħa u l-ballun naħa oħra għall-gowl tal-vantaġġ.
Seba’ minuti minn tmiem il-partita, iż-Żebbuġin spiċċaw jilagħbu b’għaxra min-nies meta tkeċċa Carl Vella.
San Ġwann Pro Evolution Academy baqgħu jikkontrollaw sal-aħħar sabiex kisbu l-11-il rebħa tal-istaġun u laħqu lill-istess Żebbuġ fil-klassifika.
Referi kien Mehmet Oral.
F’logħba oħra ferm interessanti, Balluta Barracudas u Mqabba Albions temmew il-konfront tagħhom fi dro ta’ 2-2.
Kienu Balluta li marru minn fuq permezz ta’ Diego Mora sabiex Andrew Shaw għamilhom 2-0 għat-tim tieħgu.
Mqabba wettqu reazzjoni furjuża lejn l-aħħar tant li rnexxielhom iġibu d-dro f’żewġ okkażjonijiet permezz ta’ Mamar Jobe u Jerome Azzopardi.
Referi kien Alex Grech.
Mosta Vikings kisbu rebħa prezzjuża fl-isfida tagħhom kontra r-relegazzjoni meta rebħu d-derby kontra Naxxar Victorians 3-1.
Il-Mostin kienu determinati li joħorġu bit-tliet punti minn dan il-konfront u stabilixxew vantaġġ ta’ 3-0 grazzi għal Darrell Grech, Calvin Agius u Daniel Mizzi. Keith Zammit naqqas il-marġni tal-iskor għal Naxxar.
Referi kien Milos Krstic.
Żejtun Laċċi kisbu l-ewwel rebħa tal-istaġun meta fi dwell bejn l-aħħar żewġ timijiet fil-klassifika għelbu lil Fgura Spartans 2-1. Dawn tal-aħħar qed jirriskjaw li jkunu t-tieni tim relegat wara li l-avversarji diretti tagħhom Mosta Vikings kisbu r-rebħa aktar qabel.
Kien Kledi Bakousk li poġġa lil Żejtun fil-vantaġġ sabiex Andrea Ellul ġab l-iskor indaqs għall-Fgurin. Żewġ minuti minn tmiem il-konfront, Alan Micallef skorja l-gowl l-aktar importanti għat-tim tiegħu. Minkejja kollox iż-Żwieten xorta ġew relegati għat-tielet diviżjoni.
Referi kien Reno Galea.
Mill-kampjonat tat-tielet diviżjoni, Ta’ Ġiorni Wanderers ħadu walk-over u eventwalment rebħa ta’ 3-0 kontra Ħal Far Sparks.
KLASSIFIKA – MAFA IT-TIENI DIVIŻJONI
Żebbuġ Youngsters, San Ġwann Pro Evolution Academy 33, Balluta Barracudas 28, Mqabba Albions 26, Naxxar Victorians 12, Mosta Vikings 9, Fgura Spartans 6, Żejtun Laċċi 4
KLASSIFIKA – MAFA IT-TIELET DIVIŻJONI
Swieqi Braves 24, Ta’ Ġiorni Wanderers 20, Żabbar Southsiders 17, Floriana Fsobians 13, Gudja Wanderers 9, Birkirkara St Joseph 6, Ħal Far Sparks 4
