Hekk kif tħabbar l-istaġun il-ġdid tal-FIFA esports, it-team e-nazzjonali Malti se jipparteċipa fil-finali tal-FIFAe fl-2023.
Din hija t-tieni sena nfila għar-rappreżentanti tagħna li se jipparteċipaw fis-Series Play-Ins, jiġifieri, fir-round preliminari, b’parteċipazzjoni fit-Tazza tan-Nazzjonijiet FIFA 2023 li jfisser ukoll li jingħaqdu man-nazzjonijiet elite fit-Tazza tad-Dinja tal-esport.
L-aħħar avventura tat-team e-nazzjonali Malti, bdiet fuq nota pożittiva fl-ogħla livell tal-esports, fejn temm fit-12-il post tas-Series Play-In, li iżda ġie mċaħħad mill-kwalifikazzjoni storika fit-Tazza tan-Nazzjonijiet, għal post wieħed biss.
Din id-darba l-objettiv huwa wieħed ċar, jiġifieri, li Malta tispiċċa mal-ewwel ħdax li jfisser kwalifikazzjoni f’din il-kompetizzjoni tant prestiġjuża.
Il-kompetizzjonijiet kollha tal-FIFAe bdew matul dan ix-xahar, bit-team e-nazzjonali Malti jkun fl-azzjoni fil-ġimgħat li ġejjin meta din il-kompetizzjoni popolari tilħaq il-qofol tagħha hekk kif il-players jirrappreżentaw lil pajjiżhom u jkunu jistgħu jikkwalifikaw għall-FIFAe Tazza tan-Nazzjonijiet 2023, ippreżentata minn EA SPORTS.
Din se tagħti opportunità unika lill-players li jirrappreżentaw lil Malta biex jikkompetu kontra dawk l-aqwa fid-dinja f’din il-kompetizzjoni fantastika.
Il-finali tal-FIFAe 2023 se jerġgħu jkunu l-qofol tal-istaġun li jinkludu bosta suġġetti tal-FIFAe li jvarjaw minn esports, logħob, mużika, moda, u ħafna aktar.
Il-premju li jlaħħaq total ta’ $1.2 miljuni se jitqassam fil-finali tal-FIFAe 2023 minbarra premjijiet oħra disponibbli matul l-istaġun permezz ta’ diversi avvenimenti.
