Il-Prim Ministru Robert Abela ddikjara li “Malta tibqa’ favur il-paċi, l-istabbilità u soluzzjoni ta’ żewġ stati”. Qal dan ftit tal-ħin wara li f’isem pajjiżna iffirma dikjarazzjoni internazzjonali dwar l-aħħar żviluppi fil-Lvant Nofsani.
Dr Abela tenna li l-pożizzjoni ta’ Malta hija fuq prinċipju wieħed dak ta’ djalogu u li jkun hemm impenn biex il-paċi tkun dejjiema.
Id-Dikjarazzjoni bit-titlu “E1 West Bank Settlement Plan” ġiet iffirmata mir-Renju Unit, Franza, il-Ġermanja, l-Italja, il-Kummissjoni Ewropea, mill-Olanda, Kanada, in-Norveġja, l-Awstralja, New Zealand, l-Iżvezja, il-Belġju, Spanja, l-Awstrija, il-Greċja, Ċipru, il-Finlandja, l-Iżlanda, il-Litwanja, Malta u d-Danimarka.
Id-dikjarazzjoni tgħid li l-Gvern Iżraelit iddeċieda li jippubblika tender għal kostruzzjoni E1 settlement u għal dawn il-pajjiżi din id-deċiżjoni mhux aċċettata.
“Il-Komunità internazzjonali ilha żmien topponi li jkun hemm żieda fis-settlements u dejjem wriet tħassib bil-fora internazzjonali.
B’dan l-aħħar żvilupp il-prospetti ta’ żewġ stati qiegħda tkompli titkisser.
Il-liġi internazzjonali hija ċara li l-insedjamenti Iżraeljani fix-Xatt tal-Punent huma illegali. Din hija l-pożizzjoni tal-komunità internazzjonali affermata mill-ġdid mill-Kunsill tas-Sigurtà tan-Nazzjonijiet Uniti.
Fi żmien ta’ instabbiltà gravi fix-Xatt tal-Punent b’livelli ta’ vjolenza bla preċedent mill-insedjamenti kontra ċ-ċivili, u restrizzjonijiet serji fuq l-ekonomija Palestinjana, din id-deċiżjoni hija saħansitra aktar ta’ tħassib.
Inħeġġu lill-Gvern ta’ Iżrael biex jirtira dawn il-pjanijiet immedjatament u jtemm l-espansjoni tiegħu tal-insedjamenti fix-Xatt tal-Punent. Mhux biss se jbegħduna aktar mill-paċi, iżda jkomplu jdgħajfu l-pożizzjoni internazzjonali ta’ Iżrael.
In-negozji m’għandhomx jikkunsidraw li jagħmlu offerti għal offerti ta’ kostruzzjoni. Għandhom ikunu konxji tal-konsegwenzi legali u ta’ reputazzjoni inkluż ir-riskju li jinvolvu ruħhom fi ksur serju tal-liġi internazzjonali.
Intennu l-impenn tagħna għal paċi komprensiva, ġusta u dejjiema bbażata fuq is-soluzzjoni ta’ żewġ stati. Se nkomplu naġixxu fl-interess tagħha.”