Il-President George Vella inawgura wirja li tfakkar it-30 anniversarju mit-twaqqif tar-relazzjonijiet diplomatiċi bejn Malta u l-Estonja. Il-President tal-Estonja, Alar Karis, membri tal-korp diplomatiku residenti fl-Estonja u dinjitarji oħra attendew l-inawgurazzjoni tal-wirja f’Tallinn.
Fid-diskors tiegħu, il-President Vella qal li din il-wirja hija okkażjoni xierqa ferm biex ir-relazzjoni bejn iż-żewġ pajjiżi titfakkar bl-aħjar mod possibbli: il-kultura u l-arti. Żied jgħid li fi żmien ta’ gwerra, fejn il-qerda u ċ-ċaqliq tal-persuni qed jiddominaw fil-kontinent Ewropew, tali ċelebrazzjoni tar-rispett reċiproku u l-ħbiberija bejn il-pajjiżi u l-popli tagħti nifs ġdid u tnissel kuraġġ.
Filwaqt li rringrazzja lill-fotografi kollha li qed jesibixxu x-xogħol tagħhom talli b’talent kbir qed jippreżentaw l-ispirtu li jagħmel lil Malta unika, il-President irrimarka li r-ritratti tagħhom huma wkoll ċelebrazzjoni tas-sbuħija, il-kultura għanja u l-wirt storiku ta’ Malta. Il-wirja turi l-kultura, l-istil ta’ ħajja u t-tradizzjonijiet Maltin mil-lenti ta’ ħames fotografi: Errit Kuldkepp, Jonathan Borg, Giuseppe Attard, Joseph Galea u Roger Azzopardi.
Il-wirja turi l-kultura, l-istil ta’ ħajja u t-tradizzjonijiet Maltin mil-lenti ta’ sitt fotografi: Errit Kuldkepp, Jonathan Borg, Giuseppe Attard, Joseph Galea, Roger Azzopardi u James Bianchi. “L-impenji tiegħi f’dawn l-aħħar jumejn tawni idea eċċellenti tal-punti ta’ forza li l-Estonja bniet għaliha stess tul is-snin u l-potenzjal li għandha biex issir wieħed mis-sħab ewlenin ta’ Malta, b’mod partikolari fis-settur tal-edukazzjoni u dak diġitali”, qal il-President Vella.
Matul iż-żjara, il-President ta’ Malta kien akkumpanjat mill-Ministru għall-Wirt Nazzjonali, l-Arti u l-Gvern Lokali, Owen Bonnici.