Manchester City allegatament laħqu ftehim ma’ Barcelona biex ibiegħu lill-attakkant Spanjol, Ferran Torres.
Iż-żagħżugħ ta’ 21 sena kien marbut b’mod qawwi ma’ ċaqliq lejn il-ġganti Katalani fl-aħħar ġimgħat, bil-coach Xavi jidentifika lill-istilla tas-Citizens bħala wieħed mill-miri primarji tiegħu qabel it-tieqa tat-trasferimenti ta’ Jannar.
Barcelona qablu li jħallsu €55m inizjali bil-quddiem, b’€10m oħra f’bonuses.
Barcelona huma kapaċi jħallsu t-trasferiment minkejja t-tħassib finanzjarju tagħhom, minħabba self bankarju riċenti meħud mill-ġerarkija tal-club.
Torres huwa mifhum li informa lill-manager tas-City, Pep Guardiola, bix-xewqa tiegħu li jmur jilgħab fil-Camp Nou u jirritorna f’pajjiżu, 18-il xahar biss wara li ngħaqad ma’ Manchester City mingħand Valencia għal madwar £20 miljun.
L-attakkant jemmen li għandu ċans akbar li jilgħab football regolari tal-ewwel team ma’ Barcelona, filwaqt li s-Citizens huma lesti li jħalluh jitlaq peress li diġà għandhom minjiera ta’ għażliet ta’ attakk fost il-gradi tagħhom.
Torres, li bħalissa għandu siequ miksura, għamel 43 dehra fil-kompetizzjonijiet kollha għal City, fejn skorja 16-il goal u pprovda erba’ assists.
