Manchester City iffirmaw lill-midfielder tal-Kroazja, Mateo Kovacic, 29 sena, mingħand Chelsea għas-somma inizjali ta’ £25 miljun b’kuntratt għal erba’ snin. Il-ftehim se jiswa wkoll £5 miljun f’żidiet addizzjonali.
Kovacic huwa l-ewwel akkwist tas-sajf tas-City wara li fl-istaġun li għadda rebħu t-Treble ta’ Champions League, Premier League u FA Cup.
“Din hija mossa brillanti għalija, u ma nistax nistenna biex nibda mas-City,” qal Kovacic.
Il-wasla tiegħu ssegwi t-trasferiment ħieles ta’ Ilkay Gundogan ma’ Barcelona, filwaqt li s-City kellhom offerta ta’ £90 miljun – maħsuba li kienet tinkludi ħlas inizjali ta’ £80 miljun għall-midfielder tal-Ingilterra, Declan Rice, miċħuda minn West Ham.
Kovacic ingħaqad ma’ Chelsea mingħand Real Madrid f’Awwissu 2018, inizjalment b’self, qabel iffirma kuntratt ta’ ħames snin.
Huwa għamel 37 dehra mal-club f’kampanja mqallba fl-istaġun li għadda hekk kif spiċċaw fit-12-il post fl-ogħla livell.
Kovacic kien parti mit-team ta’ Chelsea li rebaħ iċ-Champions League fl-2021, fejn daħal bħala sostitut tard fir-rebħa finali ta’ 1-0 fuq l-istess City.
Fuq livell internazzjonali, Kovacic għamel 95 dehra mal-Kroazja, fejn lagħab kull logħba hekk kif spiċċaw it-tielet fit-Tazza tad-Dinja tal-2022.
