Matthew Guillaumier ta’ Hamrun Spartans u Jade Flask ta’ Swieqi United ġew magħżula l-Players tas-Sena tal-MFA fil-kategoriji tal-irġiel u tan-nisa.
Il-premjijiet ġew ippreżentati waqt il-Malta FA Awards li saru nhar il-Ġimgħa filgħaxija fil-Lukanda Dolmen fil-Qawra.
Din hija t-tieni darba li Guillaumier rebaħ dan il-premju wara li kien rebħu l-ewwel darba fl-istaġun 2020/21 filwaqt li hija l-ewwel darba għall-attakkant ta’ Swieqi.
It-tieni spiċċa l-player ta’ Birkirkara, Yannick Yankam, u t-tielet Steve Borg ta’ Hamrun Spartans. It-tnejn huma kollegi internazzjonali Maltin ta’ Guillaumier. Flask rebħet il-premju minkejja kompetizzjoni iebsa minn Stephania Farrugia ta’ Birkirkara u r-rebbieħ tmien darbiet tal-Player tas-sena, Dorianne Theuma.
Guillaumier ingħaqad ma’ Hamrun Spartans f’Lulju wara self ta’ sitt xhur ma’ AC Siena. Huwa kien strumentali fl-avventura memorabbli tal-Ispartans fil-UEFA Conference League meta skorja erba’ goals. Huwa kien preżenti fil-biċċa l-kbira tal-logħbiet tal-Ispartans waqt il-Kampjonat BOV Premier li huma rebħu b’erba’ logħbiet fuq ir-riħ. Huwa kien preżenti fil-logħob kollu tat-team nazzjonali dan l-istaġun, meta kien anke l-captain fi tlieta mis-seba’ logħbiet.
Jade Flask kellha staġun brillanti li kien imħassar minn injury fl-aħħar ta’ Marzu. Swieqi spiċċaw dan l-istaġun fit-tieni post, u Flask irnexxielha titla’ fil-quċċata tal-lista tal-aqwa skorers b’19-il goal. Flask irritornat tilgħab f’Mejju u kienet parti mill-iskwadra li eliminat lil Birkirkara fil-kompetizzjoni tan-Knock-Out tan-Nisa. Mat-team nazzjonali hija lagħbet f’erba’ logħbiet u rnexxielha tiskorja fit-tieni partita ta’ ħbiberija kontra l-Lussemburgu.
Iż-żewġ rebbieħa ġew ippreżentati bit-trofew tal-Malta FA Player tas-Sena, mill-president tal-assoċjazzjoni, Bjorn Vassallo.
Wara l-kisba mill-aqwa ta’ Hamrun Spartans, il-coach Branco Nisevic ġie magħżul il-Coach tas-Sena, waqt li Andrea Zammit ta’ Valletta rebaħ il-premju tal-Aqwa Player Żagħżugħ. Mattia Veselji ta’ Floriana spiċċa t-tieni u Jake Vassallo ta’ Mosta t-tielet.
L-attakkant Kolumbjan ta’ Balzan, Angel Torres, ġie magħżul l-Aqwa Player Barrani waqt li l-gowl ta’ Jake Grech fil-logħba bejn Hibernians u Floriana ta’ Diċembru li għadda ġie vvutat bħala l-Aqwa Goal tal-Istaġun.
L-attakkant ta’ esperjenza ta’ Sliema Wanderers, Lydon Micallef, rebaħ l-unur tal-Aħjar Player tal-BOV Challenge League, filwaqt li l-Aqwa Player tal-Izibet Amateur League ntrebaħ minn Christian Saint Ebisindor ta’ Mġarr United.
Sadanittant, Nathan Agius ta’ Mosta u Sara Saliba ta’ Birkirkara ġew nominati Youth League Best Players (irġiel u femminili).
F’ġieħ il-kontribuzzjonijiet u d-dedikazzjoni tagħhom lejn il-football, il-president tal-Malta FA, ippreżenta l-Premju tal-President lil Joseph Micallef, segretarju ġenerali tal-Youth FA li ilu jservi, u lil eks viċii president ta’ Valletta u membru tal-Bord Eżekuttiv tal-MFA, Paul Spiteri.
Andrew Cohen, rebbieħ erba’ darbiet tal-Player tas-Sena tal-MFA u r-rebbieħa tliet darbiet, Tessie Agius, ġew introdotti fil-Malta FA Hall of Fame.
IR-REBBIEĦA KOLLHA
Player tas-Sena tal-MFA (Irġiel): Matthew Guillaumier (Hamrun Spartans)
Player tas-Sena tal-MFA (Femminili): Jade Flask (Swieqi United)
Coach tas-Sena: Branco Nisevic (Hamrun Spartans)
Player Żagħżugħ tas-Sena: Andrea Zammit (Valletta)
Player tas-Sena Barrani: Angelo Torres (Balzan)
L-Aqwa Player BOV Challenge League: Lydon Micallef (Sliema Wanderers)
L-Aqwa Player tal-Izibet Amateur League: Christian Saint Ebisindor (Mġarr United)
L-Aqwa Player tal-Youth League (Irġiel): Nathan Agius (Mosta)
L-Aqwa Player Youth League (Femminili): Sara Saliba (Birkirkara)
Fair Play Award – Luxol St Andrews
L-Aqwa Goal tas-Sena: Jake Grech (Hibernians v Floriana, 12 ta’ Diċembru, 2022)
Inklużi fil-Hall of Fame: Andrew Cohen u Tessie Agius
L-Unur tal-President: Joseph Micallef u Paul Spiteri
