Minn Cristian Muscat
Kif bdiet l-imħabba tiegħek lejn il-futbol?
L-imħabba tiegħi lejn il-futbol bdiet meta kelli biss ħames snin u kont ngħix il-Kanada. Missieri dejjem kellu passjoni kbira lejn il-logħba, u rnexxielu jgħaddiha lili wkoll. Niftakarni bilqiegħda ħdejh nara l-logħbiet fuq it-TV, naraw lil Manchester United (għalkemm ma tantx kienu f’vena daqshekk tajba dak iż-żmien), fis-sigħat bikrin ta’ filgħodu u nistaqsi ħafna mistoqsijiet. Permezz tiegħu tgħallimt mhux biss inħobb il-futbol, imma wkoll nirrispetta l-isport – id-dixxiplina, l-emozzjonijiet u s-sbuħija tal-kompetizzjoni.
Meta kont żgħir, kont inħobb ħafna wkoll l-isports Amerikani bħall-ice hockey u l-baseball – kont affaxxinat mill-enerġija u l-ispettaklu tagħhom. Iżda mal-mogħdija taż-żmien, meta ġejna lura Malta, il-futbol beda jieħu post speċjali f’qalbi. Waħda mir-raġunijiet prinċipali kienet missieri – kien jiġi jara kull logħba tiegħi, xita jew xemx, ’il bogħod jew qrib, kien dejjem hemm. Il-preżenza tiegħu kienet tfisser kollox għalija. Kien jagħtini motivazzjoni biex nagħti l-aqwa tiegħi kull darba li kont nitla’ nilgħab.
Il-futbol sar aktar minn sempliċement logħba. Huwa xi ħaġa li tgħaqqad lin-nies, li jgħallmek taħdem f’tim, tissagrifika u tgħix emozzjonijiet li ftit affarijiet oħra jistgħu jagħtuk. Illum, il-futbol mhux biss passjoni – imma parti minni.
Ħa mmur mal-ewwel għall-punt. Kif qed tħares lejn l-esperjenza ġdida tiegħek bħala kowċ ta’ Senglea Athletic FC?
Meta nirrifletti fuq l-impenn tiegħi ma’ Senglea Athletic FC, inħossni ġenwinament grat u eċċitat dwar il-vjaġġ li ġej. Dan il-klabb huwa ħafna aktar minn sempliċi tim tal-futbol – huwa komunità b’sens qawwi ta’ identità u skop. Mill-mument li bdejt ninvolvi ruħi, stajt immedjatament ngħid li Senglea Athletic huwa klabb stabbli u mmexxi tajjeb, u li l-istabbiltà hija xi ħaġa tassew siewja fl-ambjent tal-futbol tal-lum.
Waħda mill-affarijiet li tispikka l-aktar għalija hija l-kumitat, speċjalment il-president. Id-dedikazzjoni u l-imħabba tagħhom għall-klabb huma ammirevoli. Huwa ċar li mhumiex biss qed jimmaniġġjaw il-klabb bħala xogħol, iżda huma investiti profondament fis-suċċess u l-futur tiegħu. Dan it-tip ta’ passjoni joħloq atmosfera pożittiva fejn kulħadd iħossu motivat biex jagħti l-almu tiegħu.
Għalija personalment, din l-esperjenza tirrappreżenta opportunità fantastika biex nikber. Nara lil Senglea Athletic FC bħala post fejn nista’ niżviluppa l-karriera tiegħi ta’ kowċing, nitgħallem minn ħaddieħor, u nikkontribwixxi għal xi ħaġa sinjifikanti. L-ambizzjoni tal-klabb hija ta’ ispirazzjoni – għandhom viżjoni ċara għall-futur, u huma finanzjarjament stabbli, li jfisser li l-pjanijiet huma realistiċi u sostenibbli.
Dak li l-aktar jeċitani huwa l-proġett fit-tul li qed nibnu flimkien. M’aħniex iffukati biss fuq riżultati fuq medda qasira ta’ żmien; minflok, irridu noħolqu grupp ewlieni b’saħħtu kompost minn plejers, staff, u membri tal-kumitat li jaqsmu l-istess valuri u għanijiet. Dan is-sens ta’ unità u ħidma f’tim huwa kruċjali, u nemmen tassew li billi nikbru flimkien, nistgħu niksbu affarijiet kbar.
Fil-qosor, din l-esperjenza ma’ Senglea Athletic FC inħossha bħala bidu ta’ xi ħaġa speċjali. Ninsab kburi li nagħmel parti minn klabb li japprezza l-istabbiltà, l-ambizzjoni, u l-komunità, u nħares ‘il quddiem biex nikkontribwixxi l-enerġija u l-passjoni tiegħi hekk kif naħdmu lejn futur sabiħ flimkien.
Iddeskrivi r-rwol passat tiegħek bħala kowċ ta’ Mtarfa FC.
L-andament ta’ Mtarfa FC matul l-istaġun li għadda fil-BOV Challenge League kien wieħed impenjattiv ħafna u ta’ sfidi serji. Meta ħadthom jien f’Diċembru, il-klabb ilu jiffaċċja problemi finanzjarji kbar, u dan affettwa mhux biss l-operat ta’ kuljum, imma wkoll l-istabbiltà interna u l-moral tal-grupp. M’hemmx kumitat u l-president kien waħdu. Kien diffiċli għalih li joffri l-għajnuna li kienet meħtieġa biex klabb fil-livell tagħna jiffunzjona b’mod normali. Għaldaqstant, konna aħna – il-plejers u l-istaff tekniku – li kellna nieħdu l-inizjattiva.
Bħala staff tekniku konna jien u Kurt Galea – l-assistant coach. Fit-taħriġ kien jgħinna wkoll Martin Fenech – in-nannu ta’ plejer minn tagħna. Kollox kien jaqa’ fuqna – it-taħriġ, l-analiżi, u anke affarijiet li mhumiex parti mir-responsabbiltà diretta tagħna. Kien hemm ħafna sagrifiċċji minn kull min kien involut – plejers li jħallsu minn buthom għal ċertu affarijiet, staff tekniku li jagħmel xogħol barra l-ħin tiegħu, u ħidma bla waqfien biex inżommu l-klabb ħaj.
Minkejja dan kollu, il-plejers wrew karattru kbir. Qatt ma ċedew – anzi, il-problemi għaqqaduna aktar. Kull sessjoni tat-taħriġ kienet issir b’serjetà u b’passjoni. Il-prestazzjonijiet fuq il-grawnd kienu frott ta’ ħidma iebsa u dedikazzjoni ġenwina. Kull plejer ta l-aħjar tiegħu, mhux għal xi kuntratt jew flus, imma għax hemm rispett kbir lejn xulxin.
Għandna grupp ta’ rġiel li verament jemmen fil-kelma ‘tim’. Kulħadd ħadem għal għan wieħed – mhux għax il-klabb tahom l-appoġġ jew ipprovda l-kundizzjonijiet ideali, għax hekk ma ġarax. Għamluh għal xulxin, għax għandhom rispett lejn il-ħidma tagħhom, u għax għandhom kburija personali.
X’kienu t-tragwardi ta’ Mtarfa FC għall-istaġun li għadda?
Meta ħadt lil Mtarfa f’Diċembru, kulħadd ħaseb li kont miġnun. Il-klabb kellu rebħa waħda minn tmien logħbiet, u kważi kulħadd kien diġà qata’ qalbu minnhom – kienu jistennewna li se jaqaw żgur. Kulħadd kien ikkundanna lil dan il-grupp ta’ plejers.
Jien ħadt id-deċiżjoni li nehodom għax wara li rajthom jilagħbu, emmint li dan il grupp kien hafna hajr milli kien ed jidher. Kien hemm xi ħaġa f’dan il-grupp li għoġbitni – il-QALB, anki jekk ma kellhomx ħafna struttura warajhom u il-moral taghhom kien ma l-art. Onestament, ma kontx naf sew fuq l-istat finanzjarju u l-problemi organizzattivi meta daħalt. Imma minkejja kollox, dhalt ghal din l-isfida.
Kelli nibda mill-‘mindset’ tal-plejers. Normali li kunfidenza kien se ikun baxx – wara rebha fi tmien lobit, u barra min hekk dawn il-plejers ma kinux qed jitħallsu. Bdejna billi nissimplifikaw kollox. Ħallejna xi plejers iħallu l-klabb u akkwistajna erba’ plejers żgħażagħ li riedu verament juru lilhom infushom, li riedu juru li huma kapaċi jilagħbu f’dan il-livell. Fis-sessjonijiet u fil-logħbiet bdejt ninstilla stil ta’ logħob li jaqbel mal-karatteristiċi tagħhom – stil bbażat fuq ix-xogħol, l-impenn u l-organizzazzjoni.
L-ewwel seba’ logħbiet ma kienu xejn faċli – rebħa waħda u draw wieħed biss. Imma bil-mod il-mod, il-plejers bdew jemmnu fihom infushom. B’aktar logħbiet u aktar ħidma, bdejna naraw titjib reali, u fil-play-out dan deher fil-prestazzjoni u r-riżultati.
Fl-aħħar mill-aħħar, għamilna biżżejjed biex nibqgħu fil-kampjonat – mhux biss hekk, imma ksibna wkoll ir-rispett ta’ ħafna minn ta’ madwarna. Tikkonsidra min fejn konna f’Diċembru – tista’ tgħid li għamilna miraklu żgħir! Dan ma kienx staġun faċli, imma dan il-grupp ta’ plejers wera li b’qalb u xogħol tista’ tegħleb ħafna affarijiet.
Għaddi messaġġ finali lil min jixtieq jagħmel karriera ta’ suċċess fil-futbol.
Wara dawn l-aħħar żewġ staġuni, fejn kont qed niġġieled għar-relegazzjoni u xorta rnexxieli nsalva – minkejja li ħafna kienu qatgħu qalbhom minni – il-messaġġ tiegħi, mhux biss fil-futbol imma fil-ħajja b’mod ġenerali, hu dan:dejjem żomm attitudni pożittiva. Agħti l-massimu tiegħek, emmen fik innifsek, u stenna l-ebda pjaċiri mingħand ħadd.
Emmen f’dak li qed tagħmel, u kun konsistenti. L-iktar ħaġa importanti: qatt tħalli lil ħadd – speċjalment nies negattivi – ikissruk jew iġegħluk tiddubita fik innifsek. Il-mument li tibda tagħti widen lilhom, titlef lilek innifsek. Żomm rasek mgħolija, għix b’valuri, u kompli imxi ‘l quddiem … għax kull pass ‘il quddiem jgħodd!
