Il-manager ta’ Arsenal, Mikel Arteta, irrifjuta li jeskludi offerta għal Dusan Vlahovic fost l-ispekulazzjonijiet li għaddejjin dwar l-attakkant ta’ Fiorentina.
L-internazzjonali Serb kien f’forma impressjonanti għat-team Taljan tiegħu dan l-istaġun, fejn skorja 18-il goal fi 22 dehra fil-kompetizzjonijiet kollha.
Qed jingħad li Arsenal jinsabu favoriti għall-akkwist tal-player ta’ 21 sena minkejja l-interess minn Juventus, Manchester United, Manchester City u Tottenham Hotspur.
Meta mistoqsi dwar mossa possibbli għal Vlahovic, Arteta ssuġġerixxa li l-club jista’ potenzjalment jiffirma lill-attakkant matul it-tieqa tat-trasferimenti ta’ Jannar.
“Naħseb li bl-ammont ta’ affarijiet u l-mod kif irridu nevolvu l-iskwadra, irridu nimmassimizzaw kull tieqa tat-trasferimenti b’ħafna modi differenti u ninsabu attenti,” qal Arteta lill-ġurnalisti.
“Id-direttur tekniku Edu u t-team tiegħu qed jaħdmu qatigħ għax nafu eżattament x’għandna nagħmlu, u jekk nistgħux inwettqu dan f’Jannar jew fis-sajf, hija mistoqsija differenti peress li hija relatata ma’ affarijiet oħra.
“Għal darb’oħra, jekk huwa l-player it-tajjeb u nistgħu naffordjawh u nistgħu nagħmlu dak li rridu nagħmlu aħna niddiskutuh u nieħdu l-aħjar deċiżjoni possibbli.”
Fiorentina huma ħerqana li jbigħu lil Vlahovic matul it-tieqa tat-trasferimenti ta’ Jannar, bil-ftehim attwali tal-attakkant se jiskadi f’Ġunju tal-2023.
